နမ္မတူတွင် လျှပ်စစ်ဝါယာမီးကြိုးရှော့ဖြစ်ရာမှ နေအိမ် (၁)လုံး မီးလောင်မှုဖြစ်ပွာ
13 May 2025
နမ္မတူတွင် လျှပ်စစ်ဝါယာမီးကြိုးရှော့ဖြစ်ရာမှ နေအိမ် (၁)လုံး မီးလောင်မှုဖြစ်ပွား
နမ္မတူ၊ မေလ ၁၃ ရက်
တအာင်းပြည်သတင်း
တအာင်းပြည်၊ တပ်မဟာ (၂)နယ်မြေ၊ နမ္မတူမြို့တွင် မြို့မစျေးအနီး ရပ်ကွက် (၄)ရှိ နေအိမ် (၁)လုံး မီးလောင်မှု ဖြစ်ပွားခဲ့ပါသည်။
ဖြစ်စဥ်တွင် မေလ (၁၂)ရက် ည (၁၁:၄၅)အချိန်တွင် နမ္မတူမြို့ ရပ်ကွက်(၄)ရှိ နေအိမ်တစ်အိမ်သည် လျှပ်စစ်ဝါယာမီးကြိုးရှော့ဖြစ်ရာမှတစ်ဆင့် နေအိမ်မီးလောင်မှုဖြစ်ပွားခဲ့ပါသည်။ နေအိမ်အတွင်းရှိ ပစ္စည်းများအားလုံး မီးလောင်သွားခဲ့ပြီး စုစုပေါင်း ကာလတန်ဖိုး သိန်း (၂၈၀)ခန့် မီးလောင်ဆုံးရှုံးသွားခဲ့သည်။
ထိုမီးလောင်မှုဖြစ်ပွားခဲ့သည့်နေရာကို ပလောင်ပြည်နယ်လွတ်မြောက်ရေးတပ်ဦး PSLF/TNLA၏ မီးသတ်တပ်ဖွဲ့နှင့် ပြည်သူလူထုများမှ ည ( ၂း၃၀)အချိန်တွင် ဝိုင်းဝန်းငြိမ်းသတ်နိုင်ခဲ့သည်။
ပြီးခဲ့သည့် မေလ (၇)ရက်နေ့တွင်လည်း နေ့လယ် (၁း၃၀)အချိန်တွင် ကွတ်ခိုင်မြို့နယ်၊ အင်မိန်းအုပ်စု၊ မန်တုံကျေးရွာရှိ နေအိမ်တစ်အိမ်သည် ဘထ္ထရီမှတစ်ဆင့် နေအိမ်မီးလောင်မှုဖြစ်ပွားခဲ့ပါသည်။
တအာင်းပြည်ရှိ သက်ဆိုင်ရာမြို့နယ်အလိုက် မီးသတ်တပ်ဖွဲ့မှ လျှပ်စစ်မီး၊ ဖယောင်းတိုင်မီး၊ ဆေးလိပ်မီးများကို သတိပြုဖို့လိုအပ်ကြောင်းနှင့် မီးဘေးအန္တရာယ် ကြိုတင်ကာကွယ်ရန် လှုံ့ဆော်ခြင်း၊ အသိပညာပေးခြင်းနှင့် လိုက်နာရမည့် စည်းကမ်းချက်များကို ထုတ်ပြန်ခြင်းများ လုပ်ဆောင်လျက်ရှိသည်။
#PSLF/TNLA
#သတင်းနှင့်ပြန်ကြားရေးဌာန
မှတ်ချက်များ