16 May 2025

ယနေ့ မေလ ၁၆ရက် စစ်ကောင်စီတပ်မှ နောင်ချိုမြို့နယ် သုံးဆယ်ရွာတွင် အသေခံဒရုန်းဖြင့် ထပ်မံကြဲချတိုက်ခိုက်

တအာင်းပြည်၊ မေလ ၁၆ ရက်

တအာင်းပြည်သတင်း

စစ်ကောင်စီတပ်မှ တအာင်းတပ်မတော် PSLF/TNLA ထိန်းချုပ်ထားသည့် နောင်ချိုမြို့နယ်တွင် တိုက်ပွဲဖြစ်ပွားခြင်းမရှိပဲ အသေခံဒရုန်းဖြင့် ဗုံး(၃)လုံး လာရောက်ကြဲချတိုက်ခိုက်ခဲ့သည်။ 

တအာင်းတပ်မ‌‌တော် PSLF/TNLA ထိန်းချုပ်ထားသည့် နောင်ချိုမြို့နယ်၊ သုံးဆယ်ကျေးရွာတွင် ယနေ့ မေလ (၁၆)ရက် နံနက်(၉း၄၅)နာရီအချိန်တွင် (၁)ကြိမ်၊ (၉း၅၅)နာရီအချိန်တွင် (၂)ကြိမ် စစ်ကောင်စီတပ်မှတိုက်ပွဲ ဖြစ်ပွားခြင်းမရှိပဲ သုံးဆယ်ရွာကို အသေခံဒရုန်းဖြင့်လာရောက်ကြဲချတိုက်ခိုက်ခဲ့သည်။

အလားတူ စစ်ကောင်စီတပ်သည် ယမန်နေ့ မိုးကုတ်မြို့နယ်နှင့် ဆက်စပ်သည့် သပိတ်ကျင်းမြို့နယ်တွင်လည်း  ဂျက်ဖိုက်တာဖြင့် လာရောက်ပစ်ခတ်တိုက်ခိုက်ခဲ့သည်။ ဂျက်ဖိုက်တာဖြင့်ပစ်ခတ်တိုက်ခိုက်မှုကြောင့် အပြစ်မဲ့ ပြည်သူ (၃)ဦးသေဆုံးပြီး (၃)ဦးထိခိုက်ဒဏ်ရာရရှိခဲ့သည်။

မေလ ၁ရက်နေ့မှ ၁၆ရက်နေ့အထိ စစ်ကောင်စီတပ်သည် လေကြောင်းတိုက်ခိုက်မှု စုစုပေါင်း (၁၅) ကြိမ် ပစ်ခတ်တိုက်ခိုက်ရာမှ ပြည်သူလူထု  (၉)ဦးဒဏ်ရာရရှိပြီး (၆)ဦး သေဆုံးသွားခဲ့သည်။

ညီနောင်မဟာမိတ် (၃)ဖွဲ့မှ ငလျင်ဒဏ်သင့်ပြည်သူများနှင့် လူသားချင်းစာနာထောက်ထားရေး လုပ်ငန်းများ ဆက် လက်ဆောင်ရွက်နိုင်ရေးအတွက် တိုက်ပွဲဖြစ်ပွားလျက်ရှိသောနေရာများတွင် ထိုးစစ်များကို ပြုလုပ်မည်မဟုတ်ဘဲ တစ်ဖက်သတ် အပစ်ရပ်ကာလအား နောက်ထပ် (၁)လ သက်တမ်းထပ်တိုးကြောင်း မေလ ၁ရက်နေ့တွင် ထုတ်ပြန်ကြေညာခဲ့ပြီးဖြစ်သည်။

စစ်ကောင်စီတပ်သည် ၂၀၂၅ ခုနှစ် မေလ ၆ ရက်နေ့မှ ၃၁ ရက်နေ့ထိ အပစ်ခတ်ရပ်စဲရေး သက်တမ်း (၁)လ ထပ်တိုးသော်လည်း တအာင်းပြည်အတွင်း မြေပြင်ထိုးစစ်ဆင်ခြင်း၊ လက်နက်ကြီးပစ်ခတ်ခြင်း၊ ဒရုန်းနှင့် လေကြောင်းဖြင့် နေ့စဉ်အသုံးပြုတိုက်ခိုက်လျက်ရှိသည်။ 

မိဘပြည်သူများအနေဖြင့် စစ်ကောင်စီတပ်မှ အပစ်ရပ်သက်တမ်း (၁)လတိုးထားသော်လည်း နေ့စဉ်ဗုံးကြဲတိုက်ခိုက်မှုများရှိသောကြောင့် စစ်ကောင်စီတပ်၏ လေကြောင်း၊ ဒရုန်း၊ လက်နက်ကြီး ပစ်ခတ်တိုက်ခိုက်မှုရန်မှ ရှောင်ရှားနိုင်ရန် စစ်ရေးသတိအမြဲရှိရန်လိုအပ်သည်။

#PSLF/TNLA

#သတင်းနှင့်ပြန့်ကြားရေးဌာန

အမည်မဖော်ပြပါ

အမည်ဖော်ပြမည်

မှတ်ချက်ပြုမည်

မှတ်ချက်များ

သင်၏ ထင်မြင်ချက်