ဂေါႇဆီုက်ဘြာန်ဇေဝ်ဂဲ ဒါယာန်ပ်ုရ်ပဴင်ပ္လေဘျုင် ပလှံင်ရူကော ကာည်း လှံင်ကုင်ငှေါ ကူန်ရဝ်မာဂါင်ဂဲ (1)အီးယံမ်း၊ (3)အီး ကတူႈဘာတ်
17 May 2025
ဂေါႇဆီုက်ဘြာန်ဇေဝ်ဂဲ ဒါယာန်ပ်ုရ်ပဴင်ပ္လေဘျုင် ပလှံင်ရူကော ကာည်း လှံင်ကုင်ငှေါ ကူန်ရဝ်မာဂါင်ဂဲ (1)အီးယံမ်း၊ (3)အီး ကတူႈဘာတ်
ကုင်တအင်း၊ ကျံရ်ဖံန် ဆငည်း(13)
ဆဒါင်ကုင်တအာင်း
ဆီုက်ဘြာန်ဇေဝ်ဂဲ ဒါယာန်ပ်ုရ် ပဴင်ပ္လေဘျုင် ပလှံင်ရူကော ကာည်း လှံင်ကုင်ငှေါ ခေဲင်ကုင်တအာင်း။
ဘည်မိုႈဘည်ဘာည်းအ်ုန် ခည်မိုႈ ကျံရ်ဖံန် ဆငည်း(12) အခိင်ရမှိူဝ်(10:45)မိနေတ်ဒိူန် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ပဴင်ပ္လေဘျုင် ပလှံင်ရူကော ဇံင်အံင်ချှာန်းတာ (2)ပိုင်း ကူန်ရဝ်မာဂါင်ဂဲ (1)အီးယံမ်း၊ (3)အီးကတူႈဘာတ်၊ ဆဲႈဒါႇဒီန် ဂါင်ကူန်ရဝ်မာဂါင်ဂဲ (27)ဂါင်မာ် လူလှဲဝ်ဟာဝ်း။
ဒါႇခူဒီန် ရမှိူဝ်(7:40)မိနေတ်ဒိူန်မာ် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ဟာဝ်းဘိုး ပလှံင်ကုင်ငှေါ ဇံင်တာလိုင် တပြောကျောင်ပနောဘေဲႇ (2)လိူဝ်ႈ ပ္လေဘျုင်(4)ပိုင်း။
မိုႈဘိုး ကျံရ်ဖံန် ဆငည်း(11)ဒိူန်မာ် အာဝ်မိူဝ်ႈမ ပဲန်ကတီုက်ကပဲင် ပလှံင်နောင်ချှိုမာ် ဆီုက်ဘြာန်ဇေဝ်ဂဲ ဒါပ္လေဒါင်း ပဲင်ဒေဲႈ(4)လိူဝ်ႈ ဒီဂေါည်တံပ်နာန်းတအာင်း TNLA ပရဝ်ယာပျီန်။
ဘဝ်ကီုက်ဒါင်းအိုည်ဖုင် ဂေါႇမိုႈတိူရ်ႈကဝေ တကူန်ရဝ်မာဂါင်ဂဲ အီးကတူႈ ဖေးအီမ်ယာရယူႈ ကာည်း ကနာည်နံင်ဘိူန်း ရေဲန်ဇီုင်းကာန်လလ ဒါႈနံင် အာဝ်ထီမ်းဟိုက်ဘ္လောမ်ဆီုက်၊ အာဝ်ပဲန်ဟာဝ်းမ ကတီုက်ကပဴင်၊ ဂေါႇဘည်ဒီန် ကျံရ်ဖံန် ဆငည်း(1)ဒိူန် ဘဝ်ကီုက်ဒါင်းအိုည်ဖုင် စီထုက်ပ္လိူရ်ႈလေႈပ္လါႇဘေဲႇ ဖဘိုးထဲင်ဆငည်း ဒါႈနံင်ဇံင်းဟာဝ်း ကတီုက်ကပဲင်(1)ကျံရ်အောႏ။
ဆီုက်ဘြာန်ဇေဝ်ဂဲ ထုက်ရိူရ်ႈလေႈပ္လါႇဘေဲႇ ဒါႈနံင်ဇံင်းဟာဝ်း ကတီုက်ကပဴင် ဇူႈကျံရ်ဖံန် ဆငည်း(6) ရောတ် ဆငည်း(31) ဖဘိုးထဲင်ဆငည်း ဒါႈနံင်ဇံင်းဟာဝ်း ကတီုက်ကပဴင် (1 )ကျံရ်မာ် ဘည်ကဇေန်နီန်း ဆီုက်ဘြာန်ဇေဝ်ဂဲ ဂီုည်ထီမ်းဟိုက်ဘ္လောမ်ဆီုက်ဂဲ၊ ဒါပ္လေဒါင်း၊ ဒရုန်း ကာည်း ယာန်ပ်ုရ်ပဴင်ဟာဝ်းဘည်နီန် တောန်ဆငည်း။
ဂေါႇဘည်ဒီန် ဆီုက်ဘြာန်ဇေဝ်ဂဲနီန်း ဖဘိုးထဲင်ဆငည်း ဒါႈနံင်ဇံင်း ကတီုက်ကပဴင်(1)ကျံရ်မာ် ဂဲဂီုည်လည်ဒေပဴင်ဟာဝ်း ပ္လေဘျုင်ဘည်နီန် တောန်ဆငည်း ဘည်ကဆီုဝ် ကူန်ရဝ်မာဂါင်အယ်ဂဲ လိုအူန်းမိူဝ်ႈဆဒိ လိုဘယ်ဒဝ်ႎဲႈ ဘည်ဆီုက်ဘြာန်ဇေဝ်ဂဲ ဒါယာန်ပ်ုရ်၊ ဒရုန်း ကာည်း ပ္လေဒါင်းပဴင်ကဲနီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists