ပလှံင်နောင်ချှို ဆီုက်ဘြာန်ဇေဝ်ဂဲ ဒါယာန်ပ်ုရ် ရောတ်ဒေဲႈပဴင်ဘိုး ပ္လေဘျုင် ထာန်ဇံန်(250) (2)ပိုင်း
17 May 2025
ပလှံင်နောင်ချှို ဆီုက်ဘြာန်ဇေဝ်ဂဲ ဒါယာန်ပ်ုရ် ရောတ်ဒေဲႈပဴင်ဘိုး ပ္လေဘျုင် ထာန်ဇံန်(250) (2)ပိုင်း
ကုင်တအာင်း၊ ကျံရ်ဖံန် ဆငည်း(15)
ဆဒါင်ကုင်တအာင်း
ခေဲင်ကုင်တအာင်း၊ အိူင်မာဝ်းႎံင်း၊ လှံင်နောင်ချှို၊ ကျံရ်ဖံန် ဆငည်း(14) အခိင်စူမ်အံပ်(4:30)နြီဒိူန် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ဘိုး ပ္လေဘျုင်ထာန်ဇံန်(250) (2)ပိုင်း။
ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ဒီဘြောင်ချှာင် တံပ်အွံရ်ပ်ုန်လောတ်ကပီုန်တအာင်း-PSLF/TNLA ပလှံင်နောင်ချှို၊ ရဝ်တိုင်ဆယ်၊ ဂေါႇဆီုက်ဘြာန်ဇေဝ်ဂဲ ပဲင်ပ္လေဘျုင်ဘည်ဒီန် လံက်ဟာဝ်း ဂါင်(1)ဂါင် လူလှဲဝ်ႏ။
ဘဝ်ကီုက်ဒါင်းအိုည်ဖုင် ဂေါႇမိုႈတိူရ်ႈကဝေ တကူန်ရဝ်မာဂါင်ဂဲ အီးကတူႈ ဖေးအီမ်ယာရယူႈ ကာည်း ကနာည်နံင်ဘိူန်း ရေဲန်ဇီုင်းကာန်လလ ဒါႈနံင် အာဝ်ထီမ်းဟိုက်ဘ္လောမ်ဆီုက်၊ အာဝ်ပဲန်ဟာဝ်းမ ကတီုက်ကပဴင်၊ ဂေါႇဘည်ဒီန် ကျံရ်ဖံန် ဆငည်း(1)ဒိူန် ဘဝ်ကီုက်ဒါင်းအိုည်ဖုင် စီထုက်ပ္လိူရ်ႈလေႈပ္လါႇဘေဲႇ ဖဘိုးထဲင်ဆငည်း ဒါႈနံင်ဇံင်းဟာဝ်း ကတီုက်ကပဲင်(1)ကျံရ်အောႏ။
ဆီုက်ဘြာန်ဇေဝ်ဂဲ ထုက်ရိူရ်ႈလေႈပ္လါႇဘေဲႇ ဒါႈနံင်ဇံင်းဟာဝ်း ကတီုက်ကပဴင် ဇူႈကျံရ်ဖံန် ဆငည်း(6) ရောတ် ဆငည်း(31) ဖဘိုးထဲင်ဆငည်း ဒါႈနံင်ဇံင်းဟာဝ်း ကတီုက်ကပဴင် (1 )ကျံရ်မာ် ဘည်ကဇေန်နီန်း ဆီုက်ဘြာန်ဇေဝ်ဂဲ ဂီုည်ထီမ်းဟိုက်ဘ္လောမ်ဆီုက်ဂဲ၊ ဒါပ္လေဒါင်း၊ ဒရုန်း ကာည်း ယာန်ပ်ုရ်ပဴင်ဟာဝ်းဘည်နီန် တောန်ဆငည်း။
ဂေါႇဘည်ဒီန် ဆီုက်ဘြာန်ဇေဝ်ဂဲနီန်း ဖဘိုးထဲင်ဆငည်း ဒါႈနံင်ဇံင်း ကတီုက်ကပဴင်(1)ကျံရ်မာ် ဂေါႇဂဲဂီုည်လည်ဒေပဴင်ဟာဝ်း ပ္လေဘျုင်ဘည်နီန် တောန်ဆငည်း ဘည်ကဆီုဝ် ကူန်ရဝ်မာဂါင်အယ်ဂဲ လိုအူန်းမိူဝ်ႈဆဒိ လိုဘယ်ဒဝ်ႎဲႈ ဘည်ဆီုက်ဘြာန်ဇေဝ်ဂဲ ဒါယာန်ပ်ုရ်၊ ဒရုန်း ကာည်း ပ္လေဒါင်းပဴင်ကဲနီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists