တားချှာင်းဇီုင်းကာန်တောန်နဲ PSLF/TNLA ခူန်ချုတားဘုင်စော် ဟာဝ်းကတူႈကငျား ရေဲန်ပါင်ကမိုန်တောပ် ကူန်ရဝ်မာဂါင် ကနာည်နံင်ဝီရ်ကပါ်,ကပံန် ယန္တယားဘြောင်ချှာင် ပလှံင်ပ်ုန်ဘိူန်းဒေဆီမ်း ခေဲင်လံပ်တီုက်နာန်း 1027 ဒေါန်(2)နီန်
27 August 2024
တားချှာင်းဇီုင်းကာန်တောန်နဲ PSLF/TNLA ခူန်ချုတားဘုင်စော် ဟာဝ်းကတူႈကငျား ရေဲန်ပါင်ကမိုန်တောပ် ကူန်ရဝ်မာဂါင် ကနာည်နံင်ဝီရ်ကပါ်,ကပံန် ယန္တယားဘြောင်ချှာင် ပလှံင်ပ်ုန်ဘိူန်းဒေဆီမ်း ခေဲင်လံပ်တီုက်နာန်း 1027 ဒေါန်(2)နီန်
ကုင်တအာင်း၊ ကျံရ်(8) ဆငည်း (27)
တားချှာင်းဇီုင်းကာန်တောန်နဲ တံပ်အွံရ်ပ်ုန်လောက်ပ်ုန်လောတ်ကပီုန်တအာင်း PSLF/TNLA ခူန်ချုတားဘုင်စော် ကာည်း တားတီုင်ဒါင်းဘြောင်ချှာင် ခူန်အွံရ်ချု တားဂူႈဇာရ်ဂဲ လေးဟာဝ်းလံပ်တခေါရ်ဒေင် ဇူႈ ကျံရ်(8) ဆငည်(15) ရောတ် ဆငည်(18)ဒိူန်း လှေင်(4)ဆငည်းလလ ပလှံင်မာဝ်းဓံင်း၊ လှံင်မိုဂူႈ၊ လှံင်မိူင်းမီတ် ပ်ုန်ဘိူန်း တံပ်နာန်းပ်ုန်လောတ်ခြိူဝ်းတအာင်း TNLA ဒေဆီမ်းဟာဝ်း ခေဲင်လံပ်တီုက်နာန်း 1027 ဒေါန်(2)နီန်အော်။
လံပ်တခေါရ်ဒေင်ဒီန် ဂဲဟာဝ်းတခေါရ်ဒေတိူရ်ႈ ပ်ုန်ဘိူန်းဒေဆီမ်းဟာဝ်း တံပ်ဆခါန်း ကာည်း လူမ်တီုင်ဌာနအဆိုယကဲ ၊ လူမ်တီုင်ဘြောင်ချှာင်၊ ဂါင်ဆနံမ်၊ ကျောင်ဝါပနော။ ဂဲရေဲန်ဟာဝ်းပါင်ကတူႈကငျားတောပ် ကူန်ရဝ်မာဂါင် ပလှံင်မိုဂူႈ ကာည်း လှံင်မိူင်းမီတ် ကနာည်နံင်ကပါ်,ကပံန်ယန္တယားဘြောင်ချှာင် စီဆာင်လာင်းဟာဝ်းကူန်ရဝ်မာဂါင် အီဂေါည်ခေဲင်ကုင်ကဲနံပ်အောႏ။
ယာမ်မိုႈ ကျံရ်(8) ဆငည်း (17)ဒိူန်း က်ုန်ရံရ်ဇံင်ရဝ် အီဂေါည် ခေဲင်လှံင်မိုဂူႈ၊ က်ုန်ရံရ်ကောန်တီုင်ခြိူဝ်းတောန်မျိုး ကာည်း အီရံပ်ဇီုင်းကပ္လိူင်တီုင်ဘြောင်ချှာင်ဂဲ ရေဲန်ဟာဝ်းပါင်ကတူႈကငျား။ ခေဲင်ပါင်ကတူႈကငျားဒီန် ခူန်ချုတားဘုင်စော် ကမိုန်ဟာဝ်း ဘည်ဘာည်းဒေတီုက်ဘိူန်းဒေဆီမ်းလှံင်၊ ပ်ုန်ကယေင် PSLF/TNLA ဇီုင်းကာန်လံပ်တီုက်နာန်း ကာည်း ဘံန်ဟောည်ႇဆာင်လာင် လောင်မူဇံင်ပေါ်လဆီဖုင် စီကမိုန်ဟာဝ်းဘိုး ကနာည်ခေဲင်လှံင်မိူင်းမီတ် နံင်ဂေါည်ယေန်ငံင် ကာည်း ကနာည်ခေဲင်အရာပ်အရာ နံင်ဂေါည်တခိူည်း စီကမိုန်ဟာဝ်းလောင်ကဲဒီန်အောႏ။
ဆဲႈဒီန် ခူန်ချု တားဘုင်စော် စီက္လာင်းဆာင်လာင်းဒါႈ” က်ုန်ရံရ်အီဟိုက်ရောတ်ဒေဲႈ ဂဲလာည်ဝီရ်ကမိုန်ဟာဝ်း၊ ပ်ုန်ဆမွံတ်က်ုန်ရံရ်ကဲမာ် ဝီရ်ကဘ္လာင်းဆာင်လာင်းဒဲႈ၊ ကနာည်ကူန်ရဝ်မာဂါင်ကဲ နံင်ဘိူန်းချာန်းချာန်း လံပ်ပိင်ငျာ၊ လံပ်ခေါခါႇ၊ လံပ်ကဆီုပ်ဒေင် ကာည်း ကနာည်နံင်ဘိူန်းရာင်ငံရ် ကာည်း ပ်ုန်လိုအယ် ကနာည်နံင်ပနောဘေဲႇ ခေဲင်လှံင် နံင်CDMကဲ လီပ်ကဖြောမ်ကရောမ်တောပ်အယ် နံင်ကျိုးကျားကမိုန်တောပ် တတားဆြာ/ယား အီလီပ် ဖုင်CDMကဲအောႏ။
တားတီုင်ဒါင်းဘြောင်ချှာင် ခူန်အွံရ်ချု တားဂူႈဇာရ်မာ် ကမိုန်ဟာဝ်း လောင်ဇီုင်းကာန်ဘြောင်ချှာင်ခေဲင်လှံင်ကာည်း ကဲအီလီပ်ထံမ်းဇီုင်းခေဲင်တီုင်ဘြောင်ချှာင် နံင်ကဲကဖြောမ်ကရောမ်တောပ် ကူန်ရဝ်မာဂါင်ကဲအောႏ။
အီးဟိုက်ရောတ်ဒေဲႈ ခေဲင်ပါင်ကမိုန် က်ုန်ရံရ်ခြိူဝ်းကပိုမ် က်ုန်ရံရ်ဇံင်ဘြောင်ချှာင်ကဲ ဒဲႈဟာဝ်းခံင်ကျခံင်လ လောင်ဇီုင်းကာန်တီုင်ဘြောင်ချှာင် ဝီရ်ဆမွံတ်ဟာဝ်းဘိုး ပ်ုန်လိုပ်ုန်ဆိင်နံပ်ကဲ။ တိုအီးက်ုရ်ရံရ်အီဟိုက်ရောတ်ဒေဲႈခေဲင်ပါင်ကမိုန် စီမှာန်းဒါႈ” ဇိုချီုင် ဆီုက်ဘြာန်ဂဲ ဘြောင်ချှာင် ခေဲင်လှံင်မိူင်မီတ် အီကဇိူရ်ႈကယံင်းဒါခံင်မံဝ် ဘ္လံမ်းအခည်း ဆိင်ဒဲႈတားကဲ ရေဲန်ဟာဝ်းဇီုင်းကာန် တိူဝ်ႈအရေးဒါင်းဒါင်းတေဲင်ကဲဒီန်အောႏ။
ခည်မိုႈ ကျံရ်(8) ဆငည်း(18)ဒိူန်း ရေဲန်ဟာဝ်းပါင်ကတူႈကငျားတောပ် ကူန်ရဝ်မာဂါင်ကဲအီဂေါည် ခေဲင်လှံင်မိူင်မီတ်။ ခူန်ချု တားဘုင်စော် ကဘ္လာင်းဆာင်လာင်းဒါႈ နံင်ရေဲန်ဟာဝ်း ပ်ုန်ကယေင်လံပ်တီုက်ဓှီုန်း ကာည်း ဆာင်လာင်းဟာဝ်း မူဇံင်ပေါ်လာဆီဖုင် ကနာည်ဆာင်ယာတခိူည် ခေဲင်လှံင် ကာည်း ကနာည်ကူန်ရဝ်မာဂါင်ကဲ နံင်ဘိူန်းဒေဂေါည်ချှီႇတခိူည်းအောႏ။
ခူန်ချုတားဘုင်စော် စီက္လာင်းဆာင်လာင်းဒါႈ” ခေဲင်လှံင်မိုဂူႈ နံင်ကျိုးကျားရေဲန်ဟာဝ်း ဇီုင်းကာန်တီပ်ဟြီုက်ဆဲင် ကာည်း ကနာည်နံင်ဘိူန်းတာင်ပျော် ပ်ုန်ဟောမ်ပ်ုန်ဟာပ်ကဲဒီန်အောႏ။
တားတီုင်ဒါင်းဘြောင်ချှာင် ခူန်အွံရ်ချုတားဂူႈဇာရ်” ခေဲင်လှံင် ကနာည်ယန္တယားဘြောင်ချှာင် နံင်ဝီရ်ကပါ်ႇကပံန် မှာန်းကူန်ရဝ်မာဂါင်ဂဲ အီဟိုက်ရောတ်ဒေဲႈ ခေဲင်ပါင်ကမိုန် လီပ်ကဖြောမ်ကရောမ်တောပ် ဖုင်အီရံပ်ဇီုင်းတီုင်ဘြောင်ချှာင်အောႏ။
ဇိုချီုင်ကဇေန်နီန် ဇီုင်းကာန်လံပ်ဘြောင်ချှာင်ဒီန် PSLFဂဲ နံင်ရံပ်ဇီုင်းတိူဝ်ႈရေဲန်ဟာဝ်း ဆာ်ရောတ်ဒေဲႈ ဆန်ုမ် 2025ဒိူန်း ခနားဇိုချီုင် အဆိုယလံပ်တီုက်ဓှီုန်း၊ PSLF ကာည်း တိုအီးရဝ်ကဲ နံင်ကပိုမ် ရေဲန်ဟာဝ်းဇီုင်းကာန်လံပ်ဘြောင်ချှာင် ခူန်ချု တားဘုင်စော်ဒါႈ နံင်ကျိူးကျားရေဲန်ဟာဝ်း ကနာည်နံင်ပဲန်ဒေဲႈအဆိုယ အူပိုင်းအောႏ။
ဒါႇရေဲန်ပါင်ကတူႈကငျား ခူန်ချု တားဘုင်စော် ကာည်း စူမ်းဖုင်ဂဲ ရေဲန်ဟာဝ်းပါင်ကတူႈကငျားတောပ် ဖုင်အီရံပ်ဇီုင်းကပ္လိူင်တီုင်ဘြောင်ချှာင် အီဂေါည် ခေဲင်လှံင်မာဝ်းဓံင်း၊ လှံင်မိုဂူႈ ၊ လှံင်မိူင်မီတ် ကာည်း တိုအီးလူမ်တောန်တီုင်ဌာနဂဲ ဒဲႈဟာဝ်းခံင်ကျခံင်လ ကနာည်နံင်ရေဲန်ဇီုင်းကာန်၊ နှဲဟာဝ်းဒေင်ဘည်ရေဲန်တကဲအောႏ။
လံပ်တီုက်နာန်း 1027 ဒေါန်(2)နီန် ဇူႈဒေဝိူဝ်ႈဟာဝ်း ကတီုက်ကပဲင် ခေဲင်(25)ဆငည်းနီန် တံပ်နာန်းပ်ုန်လောတ်ခြိူဝ်းတအာင်း TNLAဂဲ ဘိူန်းဘိုးဒေဆီမ်းဟာဝ်း လှံင်နောင်ချေဲဝ်၊ လှံင်မာဝ်းဓံင်း၊ လှံင်ဆဘော၊ လှံင်မိုဂူႈ၊ လှံင်မိူင်မီတ် လှံင်ကဲနီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists