03 November 2025

ပ္လေါည်ႎိူဝ်ႈထီ လိူဝ်ႈ(29)နီန် အီဘိူန်းဟာဝ်း ဆုဒါင်း(500)ဆဲန်မိုႈ  တာအ‌ဆေင် အီဂေါည် ပရဝ်ဟိုမိူင်၊ လှံင်အိုမ်ယ်ုရ်

အိုမ်ယ်ုရ်၊ ကျံရ်ကိူရ်အူ ဆငည်း(3)

ဆဒါင်ကုင်တအာင်း 

ပ်ုန်ကယေင်ႎိူဝ်ႈဟာဝ်းထီတအာင်း ကနာည်လံပ်ပိင်ငျာ ကုင်တအာင်း ပ္လေါည်ႎိူဝ်ႈထီ လိူဝ်ႈ(29)နီန် အီဘိူန်းဟာဝ်း ဆုဒါင်း(500)ဆဲန်မိုႈ တာအဆေင် အီဂေါည် ပရဝ်ဟိုမိူင်၊ လှံင်အိုမ်ယ်ုရ်အောႏ။

ကနာည်ရိူန်းဒူး လံပ်ပိင်ငျာကုင်တအာင်း ကောင်ဆံရ်ဇီုင်းပိင်ငျာကုင်တအာင်း - TLEC ဂဲ ဆာ်ႈအွံရ်ႎိူဝ်ႈဟာဝ်း ထီတအာင်းလိူဝ်ႈ(29)နီန် ခည်မိုႈ ကျံရ်ကိူရ်အူ ဆငည်း(1) အခိင်ခီညှာဒိူန်  ခေဲင်ကုင်တအာင်းအူဒီ။

အက္ခရာ ဆုဒါင်း(500)ဆဲန် မိုႈ (B-01363)၊ ဆဲႈဒါႇ ဆု(500)ဆဲန် အ်ုန်တောပ် ဆု(100)ဆဲန် (1)ဆု၊ ဆု(50)ဆဲန် (1)ဆု၊ ဆု(30)ဆဲန် (1)ဆု၊ ဆု(10)ဆဲန် (2)ဆု၊ ဆု(5)ဆဲန် (4)ဆု ၊ ဆု(2)ဆဲန် (20)ဆု၊ ဆဲႈဒါႇဒီန် ချဒဲႈဟာဝ်းဘိုး အက္ခရာဆုဂဏန်းအီကနှေရ်ရဘံန်း(4)ပိုင် တဆု(500)ဆဲန် ကာည်း အီအာဝ်ကနှေရ် အက္ခရာ တဆု(100)ဆဲန်ကဲနီန်။

ခည်မိုႈ ကျံရ်အူကိူရ် ပ္လေါည်ႎိူဝ်ႈထီ လိူဝ်ႈ(28)ဒိူန် အီဘိူန်းဟာဝ်း ဆုဒါင်း(500)ဆဲန် အက္ခရာအ်ုန်မိုႈ (A-53017) ယာမပီး ဂေါည်ရဝ်ကုင်ကမာည်း၊ လှံင်အိုမ်ယ်ုရ်။

ကောင်ဆံရ်ဇီုင်းပိင်ငျာကုင်တအာင်း-TLECဂဲ ဘံန်ဟောည်ႇဒေဲႈ ဆန်ုမ်ပနောဘေဲႇ 2024-2025ဒိူန် ဘယ်ႎိူဝ်ႈဟာဝ်း ကျောင်ပနောဘေဲႇ(600)ကျောင်လှိူဝ်း၊ ကောန်ကျောင်အီဟိုက်ဂေါည် (66000)အီးလှိူဝ်း ကာည်း တာဆြာ/ယာဆြာအီပနောဂေါည် (3500)အီးလှိူဝ်း၊ ဆာ်မိုႈ ဆန်ုမ်ပနောဘေဲႇ 2025-2026နီန်း ရီန်းရဲတ်နှာင်းဆီုပ်ႎိူဝ်ႈဟာဝ်းဘိုး ‌ကျောင်အီကီုတ် ခေဲင်လှံင်ဂဲဒိူန်အောႏ။

ဂေါႇဘည်ဒီန် ပ်ုန်လိုရိူန်းဒူး အီကီုတ်ကနာည်ကျောင်ဂဲဒီန် ကာည်း ရိူန်းရူႈကျံရ် ကနာည်တာဆြာ/ယာဆြာဂဲ ရိူန်းပ်ုန်ဘိူန်းယံင်းဟာဝ်း ထီတအာင်းနီန်း စီကဇောည်ဒဲႈ ဟာဝ်းကနာည်ဂဲ၊ ဘည်ကဆီုဝ် ကူန်ရဝ်မာဂါင်အယ်ဂဲ အီဂေါည်ခေဲင်အရာပ်အရာအယ်ကဲနီန် ဆာ်အယ်ဆိင်ကဇောည်ထီဝ်း လံပ်ပိင်ငျာကောန်ကျောင်ဂဲ ဘိူန်းအူန်းကဇောည် ထိုးဒဲႈထီတအာင်း နီန်အောႏ။

#PSLF/TNLA

#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း