PSLF/TNLA ဖုင်ပလိက်ကုင်တအာင်း ရေဲန်ဟောည်ႇပ္လေါည်ပ္လိုတ် ႎါင်ပနောဖီုက်လျှံင် အီအွံရ်တံပ်ကာည်း ဇီုင်းကာန်လူမ်
18 December 2025
PSLF/TNLA ဖုင်ပလိက်ကုင်တအာင်း ရေဲန်ဟောည်ႇပ္လေါည်ပ္လိုတ် ႎါင်ပနောဖီုက်လျှံင် အီအွံရ်တံပ်ကာည်း ဇီုင်းကာန်လူမ်
အိုမ်ငျံရ်၊ ကျံရ်ကိူရ်အာရ် ဆငည်း(18)
ဆဒါင်ကုင်တအာင်း
တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ပလိက်ကုင်တအာင်း ရေဲန်ဟောည်ဟာဝ်း ပ္လေါည်ပ္လိုတ်ႎါင်ပနောဖီုက်လျှံင် အီအွံရ်တံပ်လိူဝ်ႈ(2)ကာည်း ဇီုင်းကာန်လူမ် ခည်မို ကျံရ်ကိူရ်အာရ် ဆငည်း(15) အခိင်ခီညှာ(9:00)နြီရောတ် ရဆံန်(12:00)နြီဒိူန်အောႏ။
ပ္လေါည်ပ္လိုတ်ႎါင်ပနောနီး PSLF/TNAL တားချှာင်ဇီုင်းကာန်တောန်နဲ ခူန်ချု တားဘုင်ကျော် ဟိုက်ရောတ်က္လာင်းကြောႈတံမ်းဒါႈ “ ဘည်ကဆီုဝ်ဖုင်ပလိက်ကုင်တအာင်း လိုဘယ်ကဘ္လာင်း ဆာင်လာင်းဒဲႈ အီပဲန်ပျဆနာ ခေဲင်ကုင်တအာင်းနီး၊ လိုဘယ်တိူဝ်ႈလာည်းဟာဝ်းအရေး တတိုအီးရေဲန်အကျံင်လူလေဲဝ် တောပ်ဘာည်းအခိင်ကာည်း အာဝ်လိုမိူဝ်ႈငါည်ဒဲႇငါည်ဒါင်း လိုရီန်းရဲတ်ဘယ်နှဲဒဲႈရဒေင်ကျ ကနာည်ကူန်ရဝ်မာဂါင်ဂဲ”။
ဆဲႈဒီန် က္လာင်းဒါႈဘိုး ဘည်ကဆီုဝ်ဖုင်ပလိက်ကုင်တအာင်း လိုရီန်းရဲတ်ရေဲန်ဟာဝ်း ဒဲႈအ်ုန်မိူဝ်ႈလံပ်ကတ်ုမ် တကူန်ရဝ်မာဂါင်ဂဲ၊ လံပ်ပျောဆာယာချီႇတခိူည်း၊ တိုအီးဘြား၊ တိုအီးစိုန်၊ တိုအီးကဖာႇကမှာတ်ကဲနီန် နှာင်းယောမ်ဟာဝ်း ခေဲင်ကုင်တအာင်း၊ ဒါႇခူဒီန် အီပဲန်အမှုကဲနီန်မာ် အမှုဒါင်း မောကံပ်ပဲန်အမှုဒဲႇကာည်း အမှုဒဲႇ မောကံပ် ဟြာည်ႇကမာ်ႈဟာဝ်းအောႏ။
ႎါည်ဒီန် PSLF/TNLA တားအွံရ်တီုင်ဒါင်းဘြောင်ချှာင် ခူန်အွံရ်ချု တားဂူႈဇာရ်၊ တားအွံရ်ဖုင်ပလိက် ခူန်အွံရ်ဒါင်း တားကုင်ခြီရ်၊ တာမ်ခူန်အွံရ်ဒါင်း တားတံင်ရိူန်းကာည်း အီအွံရ်ဖုင်တီုင်ကောန်အီပ်ုန် ခူန်နာန်းဒါင်း ယေကာဂဲမာ် ဟိုက်ရောတ်က္လာင်းကြောႈတံမ်း။ အာပ်ဒဲႈဟာဝ်း တအီလှဲမ်ဘေဲႇတောန်ကဒါႇ ခေဲင်ႎါင်ပနောနီးအောႏ။
ႎါင်ပနောအီအွံရ်တံပ် လိူဝ်ႈ(2)နီး ဇူႈႎိူဝ်ႈဟာဝ်း ခည်မိုႈ ကျံရ်တီမ် ဆငည်း(1)ဒိူန် ႎိူဝ်ႈဟာဝ်း လှေင်(3)ကျံရ်လှိူဝ်း။ ခေဲင်ႎါင်ပနောနီး ပနောဒဲႈဟာဝ်း ဘည်လိုရေဲန်ဇီုင်းကာန်ပလိက်၊ ဘည်ဆနံမ်းပိင်ငျာမှုခီန်၊ ဥပဒေအီုင်ဂ္လံတ်ဒါင်းကာည်း ကဆီုဝ်ကဆဲင်တဇီုင်းကာန်လူမ်ကဲနီန်အောႏ။
မိုႈဘိုး ႎါင်ပနောဇီုင်းကာန်လူမ်လိူဝ်ႈ(2)နီးမာ် ဇူႈႎိူဝ်ႈဟာဝ်း ခည်မိုႈ ကျံရ်တီမ် ဆငည်း(15)ဒိူန် ႎိူဝ်ႈဟာဝ်း လှေင်(3)ကျံရ်။ ခေဲင်ႎါင်ပနောနီး ကောန်အီမာည်းဂေါည်(14)အီးကာည်း ကောန်အီပ်ုန်ဂေါည်(32)အီး။ ပနောဒဲႈဟာဝ်း ကာ်မ်ပျူတာ၊ ဘည်လိုချှာင်တံင်အရာင်းတိုအီး၊ ဘည်အွံရ်ကောန်အီပ်ုန်၊ ကံမ်ကျာင်ပလိက်၊ ProjectManagement၊ Office Management ၊ Presentating ကာည်း ဘည်လိုကနံဝ်းတိုကဲနီန်။
အီဟိုက်ဟောည်ႇဟာဝ်း ကောန်ႎါင်ပနောကဲနီး နှာင်းဒဲႈဂဲရံပ်ထာမ်းဟာဝ်းဇီုင်းကပ္လိူင် ခေဲင်အိူင်ကာည်း ခေဲင်လှံင်၊ ပ္လေါည်ပ္လိုတ်ႎါင်ပနောနီး တားချှာင်ဇီုင်းကာန်တောန်နဲ ခူန်ချု တားဘုင်ကျော်၊ တားအွံရ်တီုင်ဒါင်းဘြောင်ချှာင် ခူန်အွံရ်ချု တားဂူႈဇာရ်၊ တားအွံရ်ဖုင်ပလိက် ခူန်အွံရ်ဒါင်း တားကုင်ခြီရ်၊ ဖုင်ပလိက်ကုင်တအာင်းဂဲ၊ အီရံပ်ဇီုင်းကပ္လိူင်တီုင်ဌာနလှံင်ဂဲ၊ တာဆြာ/ယာဆြာဂဲ ကာည်း ကောန်ႎါင်ပနောဂဲ ကစုကပိုမ်ဂေါည်(114)အီး ဟိုက်ရောတ်ဒေဲႈအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists