တားတီုင်အွံရ် PSLF/TNLA ခူန်ချုဒါင်း တားအဘုင် ကာည်း ခူန်ချု တားဘုင်ကျော် ဟိုက်ရောတ် ပ္လေါည်အာပ်ဒဲႈဘွည်ႇဒီပလိုမာ ကုင်မျံမ် ကျောင်တီုင်အိုမ်အရေးကုင် လိူဝ်ႈ(3)
29 December 2025
တားတီုင်အွံရ် PSLF/TNLA ခူန်ချုဒါင်း တားအဘုင် ကာည်း ခူန်ချု တားဘုင်ကျော် ဟိုက်ရောတ် ပ္လေါည်အာပ်ဒဲႈဘွည်ႇဒီပလိုမာ ကုင်မျံမ် ကျောင်တီုင်အိုမ်အရေးကုင် လိူဝ်ႈ(3)
အိုမ်ယ်ုရ်၊ ကျံရ်ကိူရ်အာရ် ဆငည်း(27)
ဆဒါင်ကုင်တအာင်း
တားတီုင်အွံရ် တံပ်အွံရ်ပ်ုန်လောတ်ကပီုန်တအာင်း-PSLF/TNLA ခူန်ချုဒါင်း တားအဘုင်ကာည်း ခူန်ချု တားဘုင်ကျော် ဟိုက်ရောတ်ပ္လေါည်အာပ်ဒဲႈဘွည်ႇဒီပလိုမာ ကုင်မျံမ် ကျောင်တီုင်အိုမ်အရေးကုင်(Tea Land School Of Political Science- TLSPS) လိူဝ်ႈ(3)၊ ပ္လေါည်အာပ်ဒဲႈဘွည်ႇဒီပလိုမာနီး ရေဲန်ဟာဝ်းခည်မိုႈ ကျံရ်ကိူရ်အာရ် ဆငည်း(25) အခိင်ခီညှာ(9:00) ရောတ်စာ်မ်း ရဆံန်(12:00)နြီအောႏ။
ပ္လေါည်အာပ်ဒဲႈဘွည်ႇဒီပလိုမာနီး တားတီုင်အွံရ်PSLF/TNLA ခူန်ချုဒါင်း တားအဘုင် က္လာင်းကြောႈတံမ်း ဒါႈ “ ကောန်ကျောင်အီလေႈဟာဝ်းကျောင်ကဲနီန် လိုဘယ်တဂေန်း ကနာည်ဘယ်လံပ်ဘြောင်ချှာင်၊ မောကံပ်ခြိူဝ်းမျိုးအယ် အာဝ်ဇောႈရဘံန်းခြိူဝ်းမျိုးအီးဟံရ်ကာည်း မောကံပ်ကောန်တဘိုက်ဂဲ ဘိူန်းလံပ်ကဖြေင်ကဒိူဝ်ႈအရေးတီုင်ကုင်နီး။ဒါႇခူဒီန် ဘည်ကဇေန်နီး ဟည်မိုႈလိူဝ်ႈ(3) အယ်လိုဘယ်ခ္လေါႈ ခါမ်ကီန်းဒည်းတောန်နဲ ကနာည်ခြိူဝ်းမျိုးအယ် မောကံပ်ကတာရ်ႈဒါင်းဟိုက်ဇာရ်။ ဂေါႇဘည်ဒီန် ဘည်ကဆီုဝ်ကောန်ကျောင်ဂဲ ပိင်ငျာပ်ုန်ပနောဆမားနံပ်အူန်းအယ် လိုဒါရေဲန်ဟာဝ်း ကနာည်းခြိူဝ်းမျိုးအယ် မောကံပ်ကတာရ်ႈဒါင်းဇာရ်မှယ်နီးကာည်း ဒီအီဒဲႈဇီုင်းကပ္လိူင်တအယ်မာ် လိုရံပ်ထာမ်းဟာဝ်းကတီးကရီး” ။
ဆဲႈဒီန် ပ္လေါည်အာပ်ဒဲႈဘွည်ႇဒီပလိုမာနီး တားတီုင်အွံရ် PSLF/TNLA ခူန်ချုဒါင်း တားအဘုင်၊ ခူန်ချု တားဘုင်ကျော်၊ ခူန်အွံရ်ချု တားဂူႈဇာရ်၊ ခူန်အွံရ်ဒါင်း တာပါင်လ၊ အီအွံရ် ကောင်ဆံရ်လံပ်ပိင်ငျာကုင်တအာင်း-TLEC ဒီဒီပိုႈစေင်၊ ပါမောက္ခ ဒေါက်တာဟောည်၊ တာဆြာ/ယာဆြာဂဲ၊ ကောန်ကျောင်ဂဲကာည်း ကူန်ရဝ်မာဂါင်ဂဲ ကစုကပိုမ်ဂေါည်(500)အီးလှိူဝ်း ဟိုက်ရောတ်ဒေဲႈအောႏ။
ပကျောင်နီး တာဆြာ/ယာဆြာဒါင်း အီဆမားကဲ ပ်ုန်ပနောဒဲႈဟာဝ်းဖာဆာ ဘေဲႇလူမ်တအာင်း၊ ကာ်မ်ပျူတာ၊ ဘေဲႇအိင်ဂလိက်ကာည်း အီကဆီုဝ်ကဆဲင်တလံပ်အရေးတီုင်ကုင်ကဲနီန် ကစုကပိုမ်ဂေါည်(45)ဖာဆာ။
ကျောင်တီုင်အိုမ်အရေးကုင် လိူဝ်ႈ(3)နီး ဇူႈႎိူဝ်ႈဟာဝ်း ခည်မိုႈ ဆန်ုမ်(2023) ကောန်ကျောင်အီမာည်း ဂေါည်(22)အီး၊ ကောန်ကျောင်အီပ်ုန်ဂေါည်(12)အီး ကစုကပိုမ်ဂေါည်(34)အီး ပနောဟာဝ်းလှေင် (2)ဆန်ုမ်။ ဘည်ကဆီုဝ်အီဟိုက်ဟောည်ႇဟာဝ်း ကျောင်တီုင်အိုမ်အရေးကုင် ကောန်ကျောင်ကဲနီး နှာင်းဒဲႈရံပ်ထာမ်းဟာဝ်းဇီုင်းကပ္လိူင် ခေဲင်ကုင်တအာင်းနီန်အောႏ။
ခေဲင်ကခံပ်ကယည်ပ္လေါည်နီး အာပ်ဒဲႈဘွည်ႇဒီပလိုမာနီး တကောန်ကျောင် အီဟိုက်ဟောည်ႇ ကုင်မျံမ် ကျောင်တီုင်အိုမ်အရေးကုင်နီး၊ အာပ်ချဒဲႈဟာဝ်းဆု တကောန်ကျောင်အီလှဲမ်ဘေဲႇတောန်ကဒါႇဂဲ ကာည်း အာပ်ဒဲႈပ္လါႇဘေဲႇလှိုပ်ဂုင် တတာဆြာ/ယာဆြာ အီပနောဒဲႈဂဲ။
ဆဲႈဒါႇဒီန် ဇိုချီုင်ႎိူဝ်ႈဟာဝ်းကျောင်နီး ဂေါႇမိုႈ အရေးတီုင်ကုင်မာ် ချှုက်ကႎှည်း ဘည်မိူဝ်ႈကီန်းဒါည်း ဘည်ခ္လါည်းကထောက်ဒီပနောဘေဲႇ၊ မိူဝ်ႈကီန်းဒည်း ဘည်တောႇတာဆြာ/ယာဆြာ အီနှာင်းပနောဂဲ ကာည်း မိူဝ်ႈယောကဆီုဝ်ဖေးယာန်ပ်ုရ်ကဲနီန်မာ် ကဇေန်နီး ဘည်ကဆီုဝ်ကောန်ကျောင် အီဟိုက် ကုင်မျံမ် ကျောင်တီုင်အိုမ်အရေးကုင်ကဲနီန် ဘယ်ခ္လေါႈဘိူန်လော်င်ကီန်းဒည်း တောန်နဲ ဟိုက်ဟောည်ႇဟာဝ်းကျောင်နီးအောႏ ။
ပ္လေါည်အာပ်ဒဲႈဘွည်ႇဒီပလိုမာ ကုင်မျံမ် ကျောင်တီုင်အိုမ်အရေးကုင် လိူဝ်ႈ(2) ဘယ်ရေဲန်ဟာဝ်း ခည်မိုႈ ဆန်ုမ်(2019)ဒိူန် ကောန်ကျောင်အီဟိုက်ဂေါည်(25)အီး ဟိုက်ဟောည်ႇဟာဝ်းကျောင်နီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists