ပ္လါႇဘေဲႇပ္လိူရ်ႈတောႇ ဟိုက်ႎါင်ပနောပဲန်ဆြာဘေဲႇတအာင်း(TOT) လိူဝ်ႈ(6)
25 May 2026
ပ္လါႇဘေဲႇပ္လိူရ်ႈတောႇ ဟိုက်ႎါင်ပနောပဲန်ဆြာဘေဲႇတအာင်း(TOT) လိူဝ်ႈ(6)
အိုမ်ယ်ုရ်၊ ကျံရ်ဖံန် ဆငည်း(25)
ဆဒါင်ကုင်တအာင်း
ဖုင်ဘေဲႇတအာင်း (Ta'ang Literature Association - TLA)ဂဲ ဇူႈလာက်ခါမ်ဟာဝ်း ပ္လါႇဘေဲႇတောႇဟိုက်ႎါင်ပနော ပဲန်ဆြာဘေဲႇတအာင်း (Training of Trainers - TOT) ကနာည် လိူဝ်ႈ(6) ခေဲင်ကုင်တအာင်း။
ကဆီုဝ်အီနံင်ဟိုက်ႎါင်ပနောနီန် ဘည်ပ္လပ္လေႈအူန်း ဖုင်ဘေဲႇတအာင်း-TLAဂဲ အိုမ်လှတာန်းဘေဲႇ ဆာ်မိုႈအီဟိုက်ဆနီတ်ပြီမ် လိုမိုႈအီဟိုက်ဟောည်ႇ(10)တာန်း ကာည်း ဆာ်မိုႈအီဟိုက်ဆနီတ်ကမာည်း လိုမိုႈအီဟိုက်ဟောည်ႇ Grade (12)တာန်း။
ဆဲႈဒါႇဒီန် ဖုင်ဘေဲႇတအာင်း-TLAဂဲ ပ္လူႈဆဒိက္လာင်းနံပ်ဒါႈ ကဆီုဝ်နံင်ဟြာင်းဟိုက်ႎါင်ပနောနီန် လိုဟြာင်းဟိုက်ပ္လါႇဘေဲႇ ဆန်ုမ်2026၊ ကျံရ်ပူရ် ဆငည်း(15) ရဘံန်းဆူတ်ဆူတ် ။
ဆီုင်ခည်မိုႈ ဆန်ုမ်1972ဒိူန် ဇူႈပြိူဝ်ႈလေႈဒေဲႈ ဘေဲႇတအာင်းနီန် မောကံပ်ရောတ် ဆန်ုမ်2020 ဘိူည်ဟောည်ႇနိုက်(48)ဆန်ုမ်မာ် ဘေဲႇတအာင်းနီန် အာဝ်ကတာရ်ႈဒါင်းဇာရ်၊ ခနားခြိူဝ်းမျိုးအယ်တအာင်း အာဝ်ဘိူန်းဒါရူမ်ရူမ်ရာႈရာႈ မောကံပ်ပဲန်ဘေဲႇဒူး၊ ကြောႈဒူး ကနာည်ဒါ အယ်တအာင်းပါ်ဒိုႇဒိုည်ႇ။ ဂေါႇဘည်ဒီန် ဇူႈပွံတ်ဆန်ုမ် 2026 PSLF/TNLA စီဖုင်ပြိူဝ်ႈလေႈ ဖုင်ဘေဲႇတအာင်းနီန် ဇူႈပနောဟာဝ်းပွံတ် တရဝ်ဂါင်၊ ခေဲင်ကုင်တအာင်းနီန် မောကံပ်ဘေဲႇတအာင်းကတာရ်ႈဒါင်းဇာရ်။
အီဂေါည်ရခြူမ် PSLF/TNLA တောပ်လိူည်ဘည်ဆာ်ႈအွံရ်၊ နှဲဒဲႈဒေင် ကာည်း ကဇောည်ဒဲႈ ဖုင်ဘေဲႇတအာင်း-TLAဂဲ ဘယ်ဒေႎိူဝ်ႈဟာဝ်း ႎါင်ပနော ပဲန်ဆြာဘေဲႇတအာင်း(TOT)နီန်၊ ဆန်ုမ်2021ဒိူန် ဘယ်ဒေႎိူဝ်ႈဟာဝ်း ပလှံင်ရူကောလိူဝ်ႈ(1)၊ ဆန်ုမ်2022ဒိူန် ဘယ်ဒေႎိူဝ်ႈဟာဝ်း ပလှံင်အိုမ်ယ်ုရ် လိူဝ်ႈ(2) ကာည်း လိူဝ်ႈ(3)၊ ဆန်ုမ်2024 ကာည်း ဆန်ုမ်2025 ဘယ်ဒေႎိူဝ်ႈဟာဝ်း ပလှံင်အေဲမ်ခြီရ် လိူဝ်ႈ(4) ကာည်း လိူဝ်ႈ(5)။
ပ်ုန်ကယေင်ဒေႎိူဝ်ႈဟာဝ်း ႎါင်ပနောပဲန်ဆြာဘေဲႇတအာင်းနီန် မိုႈ မောဘေဲႇတအာင်း ကံပ်ဘယ်ဒေဘ္လီုက်လှူပ် ခေဲင်ကပီုန်တအာင်း၊ မောကံပ်ဘိူန်းရိူရ်ႈလေႈပံပ်ဘေဲႇတအာင်း ကနာည်ကောန်အယ်တအာင်း ကံပ်ဘိူန်းဒီရ်ႈဘေဲႇတအာင်းဂီုန်းဂီုန်း၊ မောကံပ်ဘိူန်း ႎိူဝ်ႈႎါင်ပနောဘေဲႇတအာင်း ခေဲင်ကုင်ကပီုန်တအာင်း၊ မောအယ်တအာင်း ကံပ်ဘယ်ဆမား ကိက်/ဒါႈ ကြောႈက္လာင်း၊ ဒါဘေဲႇတအာင်းတောန်အီးအောႏ။
ဘိူန်းအူန်းဟြာင်းဟိုက်ဒေဲႈပ္လါႇဘေဲႇ ခေဲင် Google Fromနီန်အောႏ
https://taangliteratureassociation1972.netlify.app/?fbclid=IwdGRjcASApd5jbGNrBICltGV4dG4DYWVtAjExAHNydGMGYXBwX2lkDDM1MDY4NTUzMTcyOAABHmSnmCGaKPsi3iRUaYfthsUbnaVpaShUBrAwrBRiITGH9LOuHT0D5KfeGavb_aem_SfspYIJTLddBJClP6OMx7w
#တီုင်ပ္လေႈလေႈဆဒါင်
#PSLF/TNLA
Comment Lists