ဖုင်ပလိက်လှံင်ကုင်တအာင်း ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇ(2)အီး ကာည်း တိုအီးဒါခံင်ယိူည်ႇ (1)အီး ပလှံင်အိုမ်ယ်ုရ်
20 July 2026
ဖုင်ပလိက်လှံင်ကုင်တအာင်း ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇ(2)အီး ကာည်း တိုအီးဒါခံင်ယိူည်ႇ (1)အီး ပလှံင်အိုမ်ယ်ုရ်
အိုမ်ယ်ုရ်၊ ကျံရ်ပူရ် ဆငည်း(20)
ဆဒါင်ကုင်တအာင်း
ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ်၊ ပရဝ်ဘံန်လိုမ် အခိင်ဖုင်ပလိက်ကုင်တအာင်း ရေဲန်ဇီုင်းကာန်စေတ်ဆေး တိုအီးကဇိူရ်ႈကယံင်းခံင်ယိူည်ႇ ကာည်း တိုအီးဒါခံင်ယိူည်ႇ မောကံပ်ဟြာည်ကမာ်ႈ ယိူဝ်းဆငါဝ်းဆဒါင် တကူန်ရဝ်မာဂါင်ဂဲ အခိင်ဖုင်ပလိက်လှံင်ဂဲ ဟာဝ်းစေတ်ဆေးတိူရ်ႈ ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇ အီပ်ုန်(1)အီး၊ အီမာည်း(1)အီး ကာည်း တိုအီးဒါခံင်ယိူည်ႇ အီမာည်း(1)အီး။
ဘည်မိုႈဘည်ဘာည်းအ်ုန် ဘံန်ဟောည်ႇဒေဲႈ ကျံရ်ပူရ် ဆငည်း(9)ဒိူန် အခိင်ဖုင်ပလိက်ကုင်တအာင်း ရေဲန်ဇီုင်းကာန်စေတ်ဆေးဒိူန် ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇ ကဝ်အီဇီုဝ် ယာကိုင်းဆာ အဆာက်(49)ဆန်ုမ် ကဂေါပ်တောပ် ကအာင်ဆနံမ်ယာမ(250)ကအာင်။ မိုႈဘိုး ကျံရ်ပူရ်ဆငည်း(12)ဒိူန် ဘိူန်းတိုည်းဘိုး ကဝ်အီဇီုဝ်တာအံင်လ အဆာက်(33)ဆန်ုမ် ကဂေါပ်တောပ် ကအာင်ဆနံမ်ယာမ (19)ကအာင်။
ဆဲႈဒါႇဒီန် ဘံန်ဟောည်ႇဒေဲႈ ကျံရ်ပူရ်ဆငည်း(9)ဒိူန်မာ် ယိူဝ်းဆငါဝ်းဆဒါင် တကူန်ရဝ်မာဂါင်ဂဲက္လာင်းဒါႈ ကဝ်အီဇီုဝ်တာအံင်မီန်း အဆာက်(25)ဆန်ုမ် ဘျာဒေဒါ/ညွံတ်ခံင်ယိူည်ႇ ဖုင်ပလိက်လှံင်ကုင်တအာင်းဂဲ စီဟာဝ်းစေတ်ဆေးတိုည်းထိင်အူန်းအ်ုန်။
ဘည်ကဇေန်နီး ဆာ်မိုႈပ်ုန်ဘိူန်းတိုည်းအူန်း တိုအီးကဇိူရ်ႈကယံင်းခံင်ယိူည်ႇ (2)အီးဂါရ်ဒီန် တံပ်အွံရ်ပ်ုန်လောတ်ကပီုန်တအာင်း-PSLF/TNLA နံင်ဆီုပ်တိူဝ်ႈလာည်းဟာဝ်းအရေး တောပ်လိူည်ဘာည်းဥပဒေ တီုက်ယာႈအရေးခံင်ယိူည်ႇ။ ဆာ်မိုႈ တိုအီးဒါခံင်ယိူည်ႇ(1)အီးဒီန် နှာင်းဆီုပ်ဒဲႈဟာဝ်း လောင်ပိင်ငျာ တိုန်းဟာဝ်းအ်ုန် ဘြဲဆားအကျံင် ပဂါင်ဆငါး တောပ်လိူည်ဘာည်း ဇီုင်းကာန်တီုက်ယာႈအရေးခံင်ယိူည်ႇအောႏ။
ကဆီုဝ်တံပ်အွံရ်ပ်ုန်လောတ်ကပီုန်တအာင်း-PSLF/TNLA ရေဲန်ဇီုင်းကာန်တီုက်ယာႈအရေးခံင်ယိူည်ႇနီန် ဒဲႈအ်ုန်မိုႈဇီုင်းဒါင်းအူလှေ၊ ဆဲႈဒီန် ရေဲန်ဟာဝ်း ဘည်တိုအီးကဇိူရ်ႈကယံင်းခံင်ယိူည်ႇ ကာည်း တိုအီးဒါခံင်ယိူည်ႇကဲနီန် မောကံပ်ဟြာည်ကမာ်ႈ၊ ရေဲန်ဇီုင်းကာန်မောကံပ်ဘယ်ထိင်ဒဲႈ ဘံန်နံင်ဒေဲႈ (အနာဂတ်) ကောန်တဘိုက်ဂဲ ကာည်း ဇီုင်းကာန်ဘ္လီုက်လှူပ်တြားဥပဒေ၊ ဆီုပ်ရေဲန်ဟာဝ်း မောကံပ်ဘယ်ပဇာရ်ဒဲႈ ဇိုဇာတ်တိုအီးအယ် မိူဝ်ႈလံပ်ကတ်ုမ် ဘိူန်းဂေါည်လံပ်ယေင်ငံင်။
မိုႈဘိုး ဘံန်ဟောည်ႇဒေဲႈ ကျံရ်ပူရ် ဆငည်း(6)ဒိူန်မာ် ပလှံင်မိူင်လိုင် အခိင်ဖုင်ပလိက်ကုင်တအာင်း ရေဲန်ဇီုင်းကာန်တီုက်ယာႈအရေးခံင်ယိူည်ႇဒိူန် ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇ(1)အီး ကာည်း တိုအီးဒါခံင်ယိူည်ႇ(2)အီးအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists