ဘိူန်းတိုည်းကညာလံပ်ထေဝ်စဲမ်ကာည်း အီမိုႈဒလာန် ဆီုက်ဘြာန်ဇေဝ်ဂဲ ပလှံင်မာဝ်းႎံင်းကာည်း လှံင်ဆဘော
25 September 2025
ဘိူန်းတိုည်းကညာလံပ်ထေဝ်စဲမ်ကာည်း အီမိုႈဒလာန် ဆီုက်ဘြာန်ဇေဝ်ဂဲ ပလှံင်မာဝ်းႎံင်းကာည်း လှံင်ဆဘော
လှံင်မာဝ်းႎံင်း၊ ကျံရ်တီမ် ဆငည်း(25)
ဆဒါင်ကုင်တအာင်း
တံပ်အွံရ်ပ်ုန်လောတ်ကပီုန်တအာင်း-PSLF/TNLA အခိင်ဖုင်ပလိက်လှံင်ကုင်တအာင်းဂဲကာည်း တီုင်ဌာနဂဲ ကရောမ်ဒေ ရေဲန်ဇီုင်းကာန်စေတ်ဆေးဒိူန် ဘိူန်းတိုည်းတိုအီးပ်ုန်တိုန်းလေႈဒေဲ; ဆီုက်ဘြာန်ဇေဝ်ဂဲ အီမိုႈကညာလံပ်ထေဝ်စဲမ်ကာည်း ဒလာန်(10)အီးလှိူဝ်း။
ဆီုက်ဘြာန်ဇေဝ်ဂဲ အီဂေါည်ခေဲင်လှံင်လာဆေဝ် တိုန်းလေႈတိုအီးဂဲ ကနာည်နှာင်းရေဲန်ဒဲႈ ကညာလံပ်ထေဝ်စဲမ် ဒဲႈဆဒါင်တဂဲ ဒီဘြောင်ချှာင်ခေဲင်ကုင်လှံင် တံပ်ပ်ုန်လောတ်ကပီုန်တအာင်း- PSLF/TNLA ဒီမိုႈ ဘည်ဂိက်၊ ရဲင်ဘ္လောမ်တိုအီး ဂေါည်ပဂိက်၊ ဘည်မိူဝ်ႈလာက်နာက်၊ ဒီဂေါည်တံပ်ဆခါန်း ကာည်း ဘည်ဒီမိူဝ်ႈတိုအီးဂီုန်းကဲနီန်။
ဒါႇခူဒီန် ဆီုက်ဘြာန်ဇေဝ်ဂဲ တိုန်းကညာလံပ်ထေဝ်စဲမ်ကာည်း ဒလာန်ကဲနီန် ကနာည်တိုန်းဆဒါင်၊ တိူရ်ႈဒေင်ဒီနှာင်းဘိူန်းလီပ်ငှိူည်ကာည်း ဒီနှာင်းဘိူန်းတာင်ဂြိုခြီုင်လာက်နာက်ကဲနီန်။
ဆီုက်ဘြာန်ဇေဝ်ဂဲ တိုန်းတိုအီးကဲ အီမိုႈလံပ်ထေဝ်စဲမ်ကာည်း ဒလာန်ကဲနီန် ကနာည်ဒဲႈတိုန်း ဆဒါင်တဂဲ ဘည်မိုႈဘည်ဘာည်းခေဲင်လှံင် ဒဲႈကဲရေဲန်ဘည်တိုအီးဟာဝ်း ဝီရ်တေဲင်ဒေင်၊ ရေဲန်ဘည်တိုအီးကညာကောႈကား ၊ ဘည်ကညာကောႈဆဲင်ကယ်၊ ရေဲန်ဘည်တိုအီးချဲမ်၊ ရေဲန်ဘည်တိုအီးဖ္လါန်း၊ ရေဲန်ဘည်တိုအီးလေႈဒေင်ကာည်း တိုအီးကဲပ်ဂြူ၊ ယံင်းဂြူကဲနီန် တောန်မျိုးတောန်နဲအောႏ။
ကနာည်နှာင်းဘိူန်း ရေဲန်ကတူည်ႇခနားဂဲမာ် ကဲနှဲဘည်လိုရေဲန်တည်းဇိူင်၊ ဒီမိုႈဆဴင်အိုမ်မျံမ်၊ ဆဴင်ငါမ်ပ္လူး ကာည်း ဒီအာဝ်မိူဝ်ႈတိုအီးကဲနီန် ဂဲလည်ယိူဝ်းခနားကဲအူကဝ်တောအူကဝ် စီတိုန်းဆဒါင် တဆီုက်ဘြာန်ဇေဝ်ဂဲ အီမိုႈအောန်လဴင်(Platform)ဖလက်ဖောင်း Viber/ Facebook/ Wechat/ Telegramကဲနီန်။
ဂေါႇဘည်ဒီန် PSLF/TNLA ဖုင်ပလိက်ကုင်တအာင်းဂဲ စီဘိူန်းတိုည်း ပ်ုန်တိုန်းဒေဲႈ ဆီုက်ဘြာန်ဇေဝ်ဂဲ ကနာည်နှာင်းဒဲႈဆဒါင်တဂဲ အီမိုႈလံပ်ထေဝ်စဲမ်ကာည်း ဒလာန် ပလှံင်မာဝ်းႎံင်းကာည်း လှံင်ဆဘောနီန်အောႏ။
ဆီုင်ဘြာန်ဇေဝ်ဂဲနီန် တိုန်းဒေဲႈအီမိုႈ လံပ်ကတ်ုမ်ကဒါႇဆီုက်ဂဲဂီုန်း ပ်ုန်ဘိူန်းတိုည်းတိုအီးကဲ မံင်ခ္လံက်ဒိူန်မာ် တိုန်းအူန်းဒဲႈကဲဂေါည်ဒီမိူဝ်ႈ လံပ်ကတ်ုမ် ဘံန်ဖုင်ပလိက်ကုင်တအာင်းဂဲ ဟောည်ႇစေတ်ဆေး ဆာ်မိုႈအီမိူဝ်ႈ အီလူည်ႇအီုင်ဂ္လံတ်အမှုကဲဒိူန် နှာင်းတိူဝ်ႈလာည်းဟာဝ်းအရေး တောပ်လိူည်ဘည်ဥပဒေ။
#PSLF/TNLA
#တီုင်ပ္လေႈလေႈဆဒါင်
Comment Lists