ဂေါႇဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ပရဝ်အိုမ်စောန် လံက်ဟာဝ်း အီပ်ုန်(1)အီးယံမ်း၊ တောပ်ဘိုးကောန်ဒဲႇ ကူန်ရဝ်မာဂါင်ဂဲ(5)အီး ကတူႈဘာတ်
14 October 2025
ဂေါႇဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ပရဝ်အိုမ်စောန် လံက်ဟာဝ်း အီပ်ုန်(1)အီးယံမ်း၊ တောပ်ဘိုးကောန်ဒဲႇ ကူန်ရဝ်မာဂါင်ဂဲ(5)အီး ကတူႈဘာတ်
အိုမ်ယ်ုရ်၊ ကျံရ်အူကိူရ် ဆငည်း(14)
ဆဒါင်ကုင်တအာင်း
ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ်၊ ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ပရဝ်အိုမ်စောန် လံက်ဟာဝ်းအီပ်ုန်(1)အီးယံမ်း၊ တောပ်ဘိုးကောန်ဒဲႇ ကူန်ရဝ်မာဂါင်ဂဲ(5)အီး ကတူႈဘာတ်။
ကျံရ်အူကိူရ် ဆငည်း(14) အခိင်ခီညှာ(7:30)နြီဒိူန် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် (11)ပိုင်း လံက်ဟာဝ်း လိုည်းတီန်တီန်နောည် အဆာက်(16)ဆန်ုမ် ယံမ်းပွံတ်ကဆီုဝ်ဒီန်။
ဆဲႈဒီန် လံက်ဟာဝ်းဘိုး လိုည်းမေတီန်နောည် အဆာက်(15)ဆန်ုမ်၊ မာည်းနန်းဘု အဆာက်(5)ဆန်ုမ်၊ မာည်းကောင်ချှီတ်ဖျိုး အဆာက်(7)ဆန်ုမ်၊ လိုည်းမေချှီတ်တဲ အဆာက်(3)ဆန်ုမ်ကာည်း တာနန်းလီန်း အဆာက်(33)ဆန်ုမ် ကဲ(5)အီး ကတူႈဘာတ်၊ လံက်ဟာဝ်းဘိုး မံက်(2)တိုယံမ်း၊ ဆဲင်ကယ်(6)ကြောင်ကာည်း တောပ်ဘိုးကျောင်(မူကြို) ဂါင်(8)ဂါင် လူလှဲဝ်ႏဟာဝ်း။
မိုႈဘိုး ဘံန်ဟောည်ႇဒေဲႈ ကျံရ်အူကိူရ် ဆငည်း(13)ဒိူနိမာ် ဆီုက်ဘြာန်ဇေဝ်ဂဲ ဒါဇတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(6)ပိုင်း ပရဝ်ကယာဒါင်း လံက်ဟာဝ်း အီမာည်း(1)အီး ကတူႈဘာတ်၊ ကျောင်ပနောဘေဲႇ(2)ကျောင်ကာည်း ဂါင်ကူန်ရဝ်မာဂါင်ဂဲ (6)ဂါင် လူလှဲဝ်ႏ။
ဂေါႇဆီုက်ဘြာန်ဇေဝ်ဂဲ ဂီုည်လည်ဒေပဴင်ဟာဝ်း ပ္လေဘျုင်ဘည်နီန် ဘည်ကဆီုဝ်ကူန်ရဝ်မာဂါင်အယ်ဂဲ လိုအူန်းမိူဝ်ႈဆဒိ လံပ်ဆီုက်နာန်းနီန်း၊ လိုရေဲန်အူန်းမိူဝ်ႈ ရဒေင်ဒီဒံန်ခြဲ၊ ကနာည်နံင်ဒဝ်းလောတ် ဘိုန်းဒါႇယာင်ပ်ုရ်ပဴင် ဆီုက်ဘြာန်ဇေဝ်ဂဲနီန်အောႏ။
ဆီုက်ဘြာန်ဇေဝ်ဂဲနီန် အာဝ်ႎါ်န်းလိူည် ခေဲင်ကုင်တအာင်းနီန် ပ်ုန်ဖုင်ကောန်တီုင်ကုင်အီးဘားနာက်လာက်ဂဲ ကာည်း ဖုင်ယိူဝ်ႇတီုက်ႎှီုန်းဂဲ တီုက်ဘိူန်းဆီမ်းဟာဝ်း ဒီလှံင်ကဲနီန်မာ် ဂဲဒါယာင်ပ်ုရ်၊ ပ္လေဒါင်း ကာည်း ဒရိုင်း လည်ဒေပဴင်ပ္လေဲဝ်လူည်ႇဟာဝ်း အီုင်ဂ္လံတ်ဆီုက် တေဲင်ကူန်ရဝ်မာဂါင်ဂဲအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists