ဂေါႇဆီုက်ဘြာန်ဂဲ ဒါယာင်ပ်ုရ် ရောတ်ဒေဲႈပဴင် ပ္လေဘျုင် ပလှံင်မာဝ်းဓံင်း လံက် စဝ်ဆာင်ခါ(2)ပါး ကတူႈဘာတ်
20 October 2025
ဂေါႇဆီုက်ဘြာန်ဂဲ ဒါယာင်ပ်ုရ် ရောတ်ဒေဲႈပဴင် ပ္လေဘျုင် ပလှံင်မာဝ်းဓံင်း လံက် စဝ်ဆာင်ခါ(2)ပါး ကတူႈဘာတ်
မာဝ်းဓံင်း၊ ကျံရ်အူကိူရ် ဆငည်း(20)
ဆဒါင်ကုင်တအာင်း
ကုင်တအာင်း၊ ဂေါႇဆီုက်ဘြာန်ဂဲ ဒါယာင်ပ်ုရ် ရောတ်ဒေဲႈပဴင် ပ္လေဘျုင် ပလှံင်မာဝ်းဓံင်း လံက်ဟာဝ်း စဝ်ဆာင်ခါ(2)ပါး ကတူႈဘာတ်။
ကျံရ်အူကိူရ် ဆငည်း(18) အခိင် ရမှိူဝ်း(8:40)မိနေတ်ဒိူန် ပလှံင်မာဝ်းဓံင်း၊ ပရဝ်(11)မဲင်ဒီန် ဆီုက်ဘြာန်ဇေဝ်ဂဲ ရောတ်ဒေဲႈပဴင် ပ္လေဘျုင် ထာန်ဇံန်(500) (1)ပိုင်း လံက်ဟာဝ်း စဝ်ဆောင်ခါ (2)ပါး ကတူႈဘာတ်၊ ကျောင်စဝ်(1)ကျောင် ကာည်း ဓှါင်းကျောင်(1)ကျောင် လူလှဲဝ်ႏ။
ဂေါႇဆီုက်ဘြာန်ဂဲ ဒါယာင်ပ်ုရ် ရောတ်ဒေဲႈပဴင် ပ္လေဘျုင် ပရဝ်ဟိုမိူင် လံက် ကောန်အီပ်ုန်(2)အီး ကာည်း အီမာည်း (1)အီးယံမ်း၊ ကောန်အီပ်ုန်(2)အီး ကတူႈဘာတ် ဂါင်(5)ဂါင် လူလှဲဝ်ႏဟာဝ်း။
ခေဲင်ကျံရ်အူကိူရ် ဇူဆငည်း(1)ရောတ် ဆငည်း (17)နီး ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ပ္လေဘျုင် ပလှံင်ရူကော(1)လိူဝ်ႈ၊ ပလှံင်မာဝ်းဓံင်း (3)လိူဝ်ႈ၊ လှံင်ဆဘော (5)လိူဝ်ႈ၊ လှံင်မိူင်လိုင် (4)လိူဝ်ႈ၊ လှံင်အိုမ်ယ်ုရ် (4)လိူဝ်ႈ၊ အိုမ်ငျံရ် (5)လိူဝ်ႈ၊ မှိူမ်မီုတ်(3)လိူဝ်ႈ ကာည်း မိုဂူႈ (1)လိူဝ်ႈ ကစုကပိုမ် (27)လိူဝ်ႈထာန်နီန်။
ဂေါႇပ္လေဘျုင်ပဴင်ဆီုက်ဘြာန်ဇဝ်ဂဲဘည်ဒီန် လံက်ဟာဝ်း ကောန်ဒဲႇ (7)အီး၊ ကောန်အီမာည်း(11)အီး၊ အီပ်ုန်(14)အီးယံမ်း ကောန်ဒဲႇ(11)အီး၊ ကောန်အီမာည်း(14)အီး၊ အီပ်ုန်(15)အီး ကတူႈဘာတ်၊ ဂါင်(113)ဂါင်၊ ကျောင်ပနောဘေဲႇ (3)ကျောင်၊ ကျောင်စဝ် (2)ကျောင်၊ ဓှါင်းကျောင်(6)ကျောင် ကာည်း ဂါင်ဓါႈ(4)လှေ လူလှဲဝ်ႏဟာဝ်း။
ကူန်ရဝ်မာဂါင်အယ်ဂဲ ကနာည်နံင်လောတ်ဖေးယာင်ပ်ုရ် ဒရိုင်း၊ ပ္လေဒါင်း ဆီုက်ဘြာန်ဇေဝ်ဂဲ လိုတောပ်ခေါပ်ပြာႇ ပ်ုန်ရိူရ်ႈနှဲလေႈ ဘည်ရဒေင်ဒံန်ခြဲ ကနာည်နှာင်းဒဝ်းလောတ် ယာင်ပ်ုရ်ဆီုက်ဘြာန်ဇေဝ်ဂဲ။
ကညာအာဏာဇဝ်ကဲနီန် တောန်မှိူဝ် တောန်ဆငည်း ဂဲဒါယာင်ပ်ုရ်၊ ဒါဒရိုင်း ပဴင်ပ္လေဒါင်း ကာည်း ပ္လေဘျုင် တီုက်ယာပ်ုန်လူလှဲဝ်ႏ ခေဲင်ကုင်တအာင်း အာဝ်ဓါန်း ဒီဘိူန်းတဘြာင်ချှာင် ဖုင်ကောန်တီုင်ကုင် ကာည်း ဖုင်တံပ်ယိူဝ်တီုက်ဓှီုန်းအီဆံင်ခံတ်အာဏာဆျှီန် တေဲင်ကူန်ရဝ်မာဂါင်ဂဲနီန်မာ် ဆီုက်ဘြာန် ဇေဝ်ဂဲ လူည်ႇအီုင်ဂ္လံတ်ဆီုက်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists