ကျံရ်အူကိူရ် ဆငည်းအဒိူဝ်နီး (19) အခိင်ရဆံန် (12:30)မိနေတ်ဒိူန် ဂေါႇဆီုက်ဘြာန်ဇေဝ်ဂဲ ဒါနောႈကယေင်တေဲင်ကူန်ရဝ်မာဂါင်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(1)ပိုင်း လံက်တာအံင်အံင် အဆာက်(28)ဆန်ုမ်ကာည်း တာချှီတ်ဆာန်းမံင် အဆာက်(24)ဆန်ုမ် ကတူႈဘာတ်၊ ဆဲႈဒီန် လံက်ဟာဝ်းဘိုး ဂါင်ဂေါည်(2)ဂါင်၊ ယုင်စာက်မျံမ်(1)ယုင်၊ ကားပျံတ်ယံတ်ငံရ်(5)ကြောင်ကာည်း ကားကူန်ရဝ်မာဂါင်ဂဲ(4) ကြောင် လူလှဲဝ်ဟာဝ်း။

ကျံရ်အူကိူရ် ဆငည်း(18) အခိင် ရမှိူဝ်း(8:40)မိနေတ်ဒိူန် ပလှံင်မာဝ်းဓံင်း၊ ပရဝ်(11)မဲင်ဒီန် ဆီုက်ဘြာန်ဇေဝ်ဂဲ ရောတ်ဒေဲႈပဴင် ပ္လေဘျုင် ထာန်ဇံန်(500) (1)ပိုင်း လံက်ဟာဝ်း စဝ်ဆောင်ခါ (2)ပါး ကတူႈဘာတ်၊ ကျောင်စဝ်(1)ကျောင် ကာည်း ဓှါင်းကျောင်(1)ကျောင် လူလှဲဝ်ႏ။

ဆီုက်ဘြာန်ဇေဝ်ဂဲ မိူဝ်ႈနောႈကယေင်ဒါင်းဒါင်းတေဲင်ကူန်ရဝ်မာဂါင် ရောက်အခိင် (8:25)နထာန်နီး ဆီုက်ဘြာန်ဇေဝ်ဂဲ ဒါပွံတ်ယာင်ပ်ုရ် ရောတ်ဒေပ္လေႈပ္လေဘျုင် ထာန်ဇံန် (250)အာရ်ပိုင်း လံက်ဟာဝ်းကောန်ကညောမ် ဘိူန်းအဆာက်( 10 )ဆန်ုမ် လိုည်းနီလာအံင်၊ လိုည်းယီယီလဲင် ဘိူန်းအဆာက် (21)ဆန်ုမ်၊ လိုည်းဆာန်းဆာန်းအူး ဘိူန်းအဆာက် (21)ဆန်ုမ်၊ ယာအေးတာင်း ဘိူန်းအဆာက်( 35)ဆန်ုမ်၊ တာတာန်းကျော် ဘိူန်းအဆာက်( 42 )ဆန်ုမ် ကာည်း ယာအေးဟေင် ဘိူန်းအဆာက် ( 47 )ဆန်ုမ် ယံမ်းဟာဝ်းပွံတ်ကဆီုဝ်ဒီ။

ပါင်ကမိုန်ဒီန် ဇူႈဒေရေဲန်ဟာဝ်း ခည်မိုႈ ကျံရ်အူကိူရ် ဆငည်း(15) အခိင် ခီညှာ(9)နြီ စီကမိုန်က္လာင်းဟာဝ်း အခိင်ရေဲန်ဇီုင်းကာန်ဒံန်ခြဲတြားဥပဒေ မှာန်းကူန်ရဝ်မာဂါင် လီပ်က‌ဖြောမ်ကရာပ်တောပ်၊ ကနာည်နှာင်းဘယ်ဒေရေဲန် ဇီုင်းကာန် လှံင်/ရဝ် နှာင်းပျော်ဆာယာချှီႇတခိူည်းကဲဒီန်။

ကျံရ်အူကိူရ် ဆငည်း(16) အခိင်ရမှိူဝ်(6:20)မိနေတ်ဒိူန် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(500)(1)ပိုင်း ကာည်း ထာန်ဇံန်(250)(1)ပိုင်း ပဇံင်လံပ်ကြ်ုမ်၊ လှံင်မှိူမ်မီုတ်။ ဂေါႇပ္လေဘျုင်ပဲင် ဆီုက်ဘြာန်ဇေဝ်ဂဲဘည်ဒီန် လံက်ဟာဝ်း ယာအုံဆျှိုည် အဆာက်(50)ဆန်ုမ် ကတူႈဖေးဘာတ်၊ ကားအူကြောင်ကာည်း ဂါင်ဂေါည်(2)ဂါင်လူလှဲဝ်ႏဟာဝ်း။

ကျံရ်အူကိူရ် ဆငည်းအဒိူဝ်နီး(16) အခိင်(7:30)နြီဒိူန် အာဝ်မိူဝ်ႈပဲန်ကတီုက်ကပဴင်မာ် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် ပရဝ်ညောင်ကိုင်း(ဂိုရ်) လံက်လူလှဲဝ်ႏဟာဝ်း ပလိုင်းဒီဟျံင်အျံရ်အောႏ။

ဘံန်ဟောည်ႇဒေဲႈ ကျံရ်အူကိူရ်၊ ဆငည်း( 7 ) ဒိူန် အခိင် ဖုင်ပလိက်ကုင်တအာင်းဂဲ စေဲတ်မေန်း စီဘိူန်းတိုည်း တိုအီးကဇိူရ်ႈကယံင်းခံင်ယိူည်ႇ တာစိုးသူရ ဘိူန်းအဆာက်( 34 )ဆန်ုမ်၊ ယာသူဆာဝူန်း ဘိူန်းအဆာက်( 33 )ဆန်ုမ်။ ဘိူန်းတိုည်းအဂေါပ်တောပ် ကအာင်ယာမ ( 21 ) ထူပ်၊ ကအာင်ဆနံမ်( 20 )ကအာင်၊ ဖိင်လူည်း ဟံပ်အူန်းခေဲင်တော်ကဘဲဝ်အိုမ်ငါမ်း ( 10 )တော်အောႏ။

ကျံရ်အူကိူရ် ဆငည်း(14) အခိင်ခီညှာ(7:30)နြီဒိူန် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် (11)ပိုင်း လံက်ဟာဝ်း လိုည်းတီန်တီန်နောည် အဆာက်(16)ဆန်ုမ် ယံမ်းပွံတ်ကဆီုဝ်ဒီန်။

ကျံရ်အူကိူရ် ဆငည်း(12) အခိင်စူန်အံပ် (5:08)မိနေတ်ဒိူန် ဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် (250)(1)ပိုင်း ပရဝ်လယ်ဇီး။ မိုႈဘိုး အခိင်စူန်အံပ်(5:11)မိနေတ်ဒိူန် ဂဲရောတ်ဒေဲႈပဴင်ဘိုး ပ္လေဘျုင် ထာန်ဇံန်(250)(2)ပိုင်း ခေဲင်ရဝ်ပဆီး လံက်ဟာဝ်း ဂါင်ကူန်ရဝ်မာဂါင်ဂဲ(4)ဂါင်လူလှဲဝ်ႏ။