01 September 2026

တားချှာင်ဇီုင်းကာန်တောန်နဲ ခူန်ချုဘုင်ကျော်ဟိုက်ရောတ် ပ်ုန်ဖုင်ဘေဲႇတအာင်း-TLA ဆာ်ႈအွံရ်ရေဲန်ဟာဝ်းပ္လေါည်ပ္လိုတ်ႎါင်ပနော ပဲန်ဆြာပနောဘေဲႇတအာင်း-TOT လိူဝ်ႈ(6)

အေဲမ်ခြီရ်၊ ကျံရ်တီမ် ဆငည်း(1)

ဆဒါင်ကုင်တအာင်း

ကုင်တအာင်း၊ လှံင်အေဲမ်ခြီရ် ဖုင်ဘေဲႇတအာင်း-TLA ဆာ်ႈအွံရ်ရေဲန်ဟောည်ႇဟာဝ်း ပ္လေါည်ပ္လိုတ် ႎါင်ပနော-TOTလိူဝ်ႈ(6) ခည်မိုႈကျံရ်တာရ်ဆငည်း(26)ဒိူန် PSLF/TNLA တားချှာင်ဇီုင်းကာန်တောန်နဲ ခူန်ချုဘုင်ကျော် ဟိုက်ရောတ်ဒေဲႈအောႏ။

ပ္လေါည်ပ္လိုတ်ႎါင်ပနောဒီန် ခူန်ချုဘုင်ကျော်  က္လာင်းဒါႈနံင်ရီန်းရဲတ်ရေဲန်ဟာဝ်း တာဆြာ/ယာဆြာဂဲ အီနံင်လေႈဟာဝ်းႎါင်ပနောနီန် အာဝ်ႎံန်းလိူည် မိုႈဆြာပနောဘေဲႇတအာင်းအူနဲ လိုထိင်ခြဲပဇာရ်ဒဲႈဟာဝ်း ဘေဲႇတအာင်း၊ ဘေဲႇလူမ် ကာည်း ထုင်မှိူမ်ဂြူခ်ြမ်ကူန်မာ လိုရံပ်ထာမ်းဟာဝ်းဇီုင်းကပ္လိူင် ပဲန်အီအွံရ်ကတိုရ်ႈဒဲႈတည်း တကောန်တဘိုက်ဂဲ အီယိူဝ်ႇဘံန်း ကာည်း လိုတိူဝ်ႈကနေဲႈဇီုင်းကပ္လိူင်အယ်ကာည်း ပ်ုန်လိုတောပ်ဆြာ  ရီန်းရဲတ်ရေဲန်ဟာဝ်း ကနာည်ဟြေဲႈဒါင်းဟိုက်ဇာရ် ဘေဲႇတအာင်းနီန်အောႏ။

ဆဲႈဒါႇဒီန် က္လာင်းဒါႈဘိုး မောကံပ်ဘေဲႇတအာင်းနီန် ဟြေဲႈဒါင်းဟိုက်ဇာရ် ရောတ်စာ်မ်းမေဂျာတက္ကသိုလ် ကာည်း ချှံန်မဟာဘွည်ႇ ဘံန်နံင်ဒေဲႈ မောကံပ်ကနှေရ်တောပ်ခေတ်ကာပ်နီးပိင်ငျာ ဘာည်းပ်ုန်မောင်အူန်း ကာည်း အယ်ပါ်ဒိုႇဒိုည်ႇ လိုရီန်းရဲတ်ရေဲန်ဟာဝ်း မောကံပ်ကဝါႈရီတ်မံင်ဒေဲႈ အခါန်းကဏ္ဍ ဘေဲႇတအာင်းနီန် တေဲင်ကံမ်ဖာဒစ်ဂျစ်တယ်။

ပ္လေါည်ပ္လိုတ်ႎါင်ပနောဒီန် တံပ်အွံရ်ပ်ုန်လောတ်ကပီုန်တအာင်း-PSLF/TNLA တားချှာင်ဇီုင်းကာန်တောန်နဲ ခူန်ချုဘုင်ကျော်၊ ဂေါပ်တားချှာင်ဇီုင်းကာန်တောန်နဲ(1) ခူန်အွံရ်ချု အိုမ်တမာဝ်း၊ အီအွံရ်ဖုင်ဘေဲႇတအာင်း တာလှအံင်ကာည်း အီရံပ်ကပ္လိူင်ဂဲ၊ တာဆြာ/ယာဆြာဂဲ ကာည်း ကောန်ႎါင်ပနောဂဲ ကစုကပိုမ်‌ဂေါည်(150)အီး ဟိုက်ရောတ်ဒေဲႈ။

ခေဲင်ႎါင်ပနောဒီန် ပနောဒဲႈဟာဝ်း ပ္လံက်တံင်ဇူႈဘေဲႇတအာင်း၊ ဘျြံင်ဘေဲႇတအာင်းကာည်း ဘည်ကပိုမ်ခမိုဘျြံင်ဘေဲႇ၊ ဘည်ဂြီရ်ႈပ်ုန်ဆမွံတ်ဘေဲႇတအာင်း၊ ဘည်ဒါ Teacher Guide၊ ဘည်ဂြီရ်ႈလေႈ Lesson Planning ကာည်း Classroom Management၊ အ်ုန်တောပ်ဘိုး ပ္လံက်တံင်ဇူႈ အီကဆီုဝ်ကဆဲင်ဘာည်းပနောဘေဲႇကာည်း ဘာည်းလိုဒါအခ်ုကဲနီန်။

ပ္လေါည်ပ္လိုတ်ႎါင်ပနောဒီန် အာပ်ချဒဲႈဟာဝ်းလှိုပ်ဂုင်ဆု တကောန်ႎါင်ပနောဂဲ အီလှလံမ်းဘေဲႇ ခေဲင်ဇိုချီုင်ႎါင်ပနော ကာည်း အာပ်ချဒဲႈဟာဝ်း ပ္လါႇဘေဲႇအံင်လာက်မှာတ် (Certificate) ကောန်ႎါင်ပနောဂဲ အီဟိုက်ဟောည်ႇႎါင်ပနောနီန်။

ကောန်ႎါင်ပနော အီဟိုက်‌ဟောည်ႇဟာဝ်းႎါင်ပနောကဲနီန် နံင်ဒဲႈဂဲရံပ်ထာမ်းဟာဝ်း ဇီုင်းကပ္လိူင် ပကျောင်ပနောဘေဲႇတောန်ဒီတောန်လှံင် ခေဲင်ကုင်တအာင်းနီန် နံင်ရေဲန်တောပ်ပဲန်ဟာဝ်းအီထာမ်းဇီုင်းကပ္လိူင်လံပ်ပိင်ငျာ ကတိုရ်ႈတည်းပနောဒဲႈဟာဝ်း ထုင်မှိူမ်ဂြူခ်ြုမ်ကူန်မာ ကာည်း ဘေဲႇတအာင်း၊ ကြောႈဖာဆာကူန်မာ တကောန်တဘိုက် အီယိူဝ်ႇဘံန်းဂဲအောႏ။

Website Official

www.taangland.org

Telegram Official Channel

https://t.me/pslftnlanews

Telegram Link – Ta’ang TV

https://t.me/pslftnlaTaangTV

YouTube Official

https://www.youtube.com/@pslftnlanews

#PSLF/TNLA

#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း