ပ်ုန်ကယေင်ႎိူဝ်ႈဟာဝ်းထီတအာင်း ကနာည်ရိူန်းဒူးလံပ်ပိင်ငျာကုင်တအာင်း ပ္လေါည်ႎိူဝ်ႈထီ လိူဝ်ႈ(35)နီန် ဂေါႇမိုႈအာဝ်မိူဝ်ႈ အီဘိူန်းဟာဝ်း ဆုဒါင်း(500)ဆဲန်နီန် အီဘိူန်းဟာဝ်းဆုဒါင်းနံပါတ်အာရ်(300)ဆဲန်မိုႈ လိုည်းနန္ဒာထူန်း အီဂေါည်လှံင်ကုင်ငှေါ။

ကုင်တအာင်း ခေဲင်ကျံရ်ဖိုန်နီး ဖုင်ပလိက်ကုင်တအာင်းဂဲ ဘိူန်းတိုည်းတိုအီး ကဇိူရ်ႈကယံင်းခံင်ယိူည်ႇ(4)အီး ကာည်း တိုအီးခံင်ယိူည်ႇ(10)အီး ပလှံင်အေဲမ်ခြီရ်၊ လှံင်မိူင်းလိုင်း၊ လှံင်အိုမ်ယ်ုရ် ကာည်း လှံင်ကုင်ငှေါအောႏ။

ခေဲင်လှံင်ရူကော ကျံရ်ဖိုန်၊ ဆငည်း(30)ဒိူန် အခိင်ရဆံန်(11:30)နြီ ကားတာင်ကူမ် ဇူႈပရဝ်ဟိုမှိုင်းလေႈ ကဒါႇ လှံင်ရူကော ဘ်ုန်‌ရောတ်တဒေင်ကကာႈအူဒီန် ဇူႈကဒါႇလူမ်ပလိက် မောင်းဒေဲႈကညားဆဲင်ကယ်ဒီန် စီပဲန်ကဒူႈဟာဝ်းကဆီုဝ်ဒီန်အောႏ။

တံပ်အွံရ်ပ်ုန်လောတ်ကပီုန်တအာင်း-PSLF/TNLA အီမိုႈတီုင်ဌာနအူလှေ တီုင်ကောန်အီပ်ုန် ဟြေဲႈဒါင်းဟိုက်ဇာရ် ခေဲင်ကျံရ်ဖိုန်နီန် ဘယ်‌လေႈဒေင် ဒဲႈလော်င်ပိင်ငျာ ရေဲန်ဇီုင်းကာန်ဒဲႈလော်င်ပိင်ငျာ တကူန်ရဝ်မာဂါင်ဂဲ ခေဲင်ရဝ်(37)ရဝ်အောႏ။