ပမိူင်းလိုင် ကာည်း လှံင်အေဲမ်ခြီရ် ဖုင်ပလိက်ကုင်တအာင်းဂဲ ကာည်း တီုင်တံပ်ဒါင်း(1) တီုင်တံပ်(101) အခိင်ရေဲန်ဇီုင်းကာန်တီုက်ယာ်ႈအရေးခံင်ယိူည်ႇ ဘိူန်းတိုည်း အီကဇိူရ်ႈကယံင်းခံင်ယိူည်ႇ (2)အီး ကာည်း အီဒါခံင်ယိူည်ႇ(2)အီး အောႏ။
ဒီရ်;ကဇေန်နီး
အရာင်ဆဒါင်နီးမိုႈ ဂေါႇမိုႈဟည်ရောတ်စာ်မ်းဒေဲႈ ဇိုချီုင်ခေါႈချီုင်မှည် ဘည်တိူရ်ႈယိူဝ်း တံပ်အွံရ်ပ်ုန်လောတ်ကပီုန်တအာင်း- PSLF/TNLA ဖုင်ပျံတ်ယံတ်ငံရ် ဆာ်ႈဟိုရ်ပ္လူႈဒဲႈဆဒိလော်င်ပိင်ငျာ ဘည်လိုဒံန်ခြဲအန္တရာယ်ဖေးငံရ် ပလှံင်ကုင်ငှေါ၊ အိူင်အိုမ်ယ်ုရ်၊ ခေဲင်ကုင်တအာင်းအောႏ။
ပ္လေါည်အာပ်ဒဲႈဘွည်ႇဒီပလိုမာနီန် ကျောင်အကယ်ဒမီဥပဒေတအာင်း(Ta’ang Law Academy) လိူဝ်ႈ(2) ဆဲႈဒါႇကောန်တဘိုက်အီဂေါည် ခေဲင်အရာပ်အရာတအာင်း အ်ုန်တောပ်ဘိုး ကောန်ကျောင်အီဂေါည်ကုင်ကယန်း(4)အီး ကစုကပိုမ်ဂေါည်(50)အီး ဟိုက်ရောတ်ပနောအံင်ဟာဝ်း။
ဘည်တိူရ်ႈယိူဝ်းအရာင်နီးမိုႈ ရေဲန်ဟိူင်ဟိူင်ဆာဆာ ပ္လေါည်ခါမ်ဆာင်လော်င် ကျံရ်အာရ် ဆငည်း(18)ရောတ် ဆငည်း(20) ခေဲင်ဘြည်အိုည်နိုက်နိုက် ပရဝ်ကွံန်ကောက် လှံင်ကုင်ငှေါ၊ အိူင်အိုမ်ယ်ုရ်၊ ခေဲင်ကုင်တအာင်းအောႏ။
ဖေးအန္တရာယ်ငံရ်နီန် အ်ုန်ဆမာဒဲႈအဆာက်ကာည်း ဂြိုခြီုင်ရဝ်ဂါင် ချှူမ်လူလှဲဝ်ႏဟာဝ်း။ အီတောပ်ခေဲင် ဖေးအန္တရာယ်ဖံန်ပါး အီမိုႈဖေးအန္တရာယ်ငံန်နီန် အ်ုန်ဆမာဒဲႈဇိုဇာတ် ကာည်း တဒင်္ဂဂြိုခြီုင်ခေဲင်ဂါင်အယ် လူလှဲဝ်ႏပဲန်ဖေးအန္တရာယ်ဒါင်း။ အယ်ဆံင်ဘယ်ဝီရ်တီပ်ဟြီုက် ဂြိုခြီုင်ပ်ုန်တိူဝ်ႈဘြားဟာဝ်း တိုအီဘြားကဲမံင်ခ္လံက်ဒိူန်မာ် ဆာ်အယ်ကတူႈငံရ်က္လိုႇ ဂြိုခြီုင်ခေဲင်ဂါင်အယ် နံင်ကတူႈချှူမ်ဟာဝ်းဒိုည်ႇ။
ပ်ုန်ဒီရ်;ဂီုန်း
