ဆီုက်ဘြာန်ဇေဝ်ဂဲ ဒါယာန်ပ်ုရ် ရောတ်ဒေဲႈပဴင်ပ္လေဘျုင် ထာန်ဇံန်(250) (2)ပိုင်း ပလှံင်မိုးဂူႈ၊ အိူင်မိုးဂူ၊ ခေဲင်ကုင်တအာင်း။

တံပ်အွံရ်ပ်ုန်လောတ်ကပီုန်တအာင်းPSLF/TNLA ဒီဘိူန်းဘြောင်ချှာင် လှံင်(6)လှံင်ဒီန် မာဝ်းႎံင်း၊ နောင်ချှို၊ ကိုက်ခည်း၊ ရူကော၊ အိုမ်ငျံရ် ကာည်း ဆဘော ပလိက်ကုင်တအာင်းဂဲ ဘိူန်းတိုည်းတိုအီးဒါခံင်ယိူည်ႇ ကာည်း တိုအီးကဇိူရ်ႈကယံင်း(13)အီး၊ (65)အီးတိုအီးဒါခံင်ယိူည်ႇအောႏ။

ကုင်တအာင်း၊ လှံင်ကိုက်ခည်း၊ ခမိုဟိုနောင်၊ ရဝ်ကုင်းချံမ်း ကောန်အီမာည်း(3)အီး ကတူႈကဆာႈတဲႈ ယံမ်းဟာဝ်းအောႏ။

ကုင်တအာင်း၊ အိူင်အေဲမ်ခြီရ်၊ လှံင်မူစယ်၊ ခေဲင်ရဝ်နမ့်အွမ် ကောန်အီမာည်းအီအူ ဂေါႇအ်ုန်ဒါဂီုန်းခံင်ယိူည်ႇ ပဲန်အမူလာည်ကငေါႈယံမ်းအောႏ။

ကုင်တအာင်း၊ ပလှံင်မှိူမ်မီုတ် ကာည်း ခေဲင်လှံင်အေဲမ်ငူည် ပဲန်ငံရ်က္လိုႇ ဂါင်(3)ဂါင် ကစုကပိုမ်ချူမ်ဟာဝ်း ရိူန်း(300)ဆဲန်လေႈထာန်နီန်းအောႏ။

ကုင်တအာင်း၊ အိူင်အိုမ်ယ်ုရ်၊ လှံင်အိုမ်ငျံရ်၊ ပရဝ်နားမံတ် ကောန်ကျောင်အူအီး လေႈကနိုက်ပအေဲမ်ခိုမ် စိုမ်အိုမ်ယံမ်းဟာဝ်းအောႏ။

ဖုင်ပလိက်ကုင်တအာင်းဂဲ ဘိူန်းတိုည်းအူန်း ဖုင်အီးတောပ်ဒေဘြားဆဲင်ကယ် ကူန်ရဝ်မာဂါင်ဂဲ အီမာည်း(5)အီး ပရဝ်ကုင်ကမာည်း၊ လှံင်အိုမ်ယ်ုရ်၊ ခေဲင်ကုင်တအာင်း။

ပလိက်ကုင်တအာင်းဂဲ တိုည်းအူန်း ကနာည်နံင်တိူဝ်ႈလာည်းအရေး တိုအီးလူည်ႇအမှုငံန် တေဲင်ကောန်ဒဲႇ အဆာက်ညှံမ်နိုက် ကောန်အီမာည်းအူအီး ပလှံင်အိုမ်ယ်ုရ် ၊ အိူင်အိုမ်ယ်ုရ်၊ ခေဲင်ကုင်တအာင်း။

ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ်၊ ပရဝ်လံင်တာ့် ကောန်ဒဲႇ(2)အီး တိူဝ်ႈဒေကနိုက်မဴင် မဴင်ဒီန်စီပဒူႈ လံက်ဟာဝ်း ကတူႈဖေးဆဲဝ်ဒါင်း။