တံပ်အွံရ်ပ်ုန်လောတ်ကပီုန်တအာင်း-PSLF/TNLA အီမိုႈတီုင်ဌာန ကောန်အီပ်ုန်ဟြေဲႈဒါင်းဟိုက်ဇာရ်ဂဲ ခေဲင်ကျံရ်တောရ်နီန် ဘယ်လေႈဒေင် ဒဲႈလော်င်ပိင်ငျာ လောင်အခွါင်းအရေးကောန်အီပ်ုန်၊ လံပ်ခေါခါႇ ကာည်း လောင်ရဟောမ်ရမာ ခေဲင်လှံင်(9)လှံင်၊ ရဝ်(36)ရဝ် ကာည်း ကစုကပိုမ် ကူန်ရဝ်မာဂါင်ဂဲ (1296)အီးအောႏ။

ကုင်တအာင်း၊ ပလှံင်အေဲမ်ခြီရ် ကာည်း လှံင်ရူကော ပ်ုန်ကယေင် မောကံပ်ဘယ်ရေဲန်ဇီုင်းကာန်လံပ်ဘြောင်ချှာင် ကူန်ရဝ်မာဂါင်ဂဲ ရောတ်ကစာ်မ်းဒီ တီုင်ဘြောင်ချှာင် ဆာ်ႈအွံရ်ရေဲန်ဟောည်ႇပ္လေါည်ႎါင်ပနော ဇီုင်းကာန်လူမ်စြေးဇံင် ကာည်း စြေးခမို လိူဝ်ႈ(9) အောႏ။

တံင်ပိုႈခေဲင်ပ်ုန်တီႇဆ်ုမ်အူန်း ပကဘူမ်တီႇဆ်ုမ်ဒီန် မိုႈ ပိုႈစေင်၊ ကာမ်ကော်၊ ခယေ၊ ဆေင်ပါန်းလ၊ ဆေင်ခိုပါန်း၊ ရေသင်းဝင်၊ ငုဝါ၊ ငုရွှေ၊ ငုစပ်၊ သပြေဘူတ၊ ပိတောက်၊ အုန်းပွါး၊ ထဲင်ဝမ်ဗန်ဒါ ကာည်း အာကျုံးလမ်း ဘိူန်း‌ရောတ်ထုတ်လာည်အောႏ။

ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ်၊ ပရဝ်ရဝ်ခ်ု စဝ်ဒါင်း ဘဒ္ဒန္တပညာနန္ဒ ဆာ်ႈအွံရ် ရေဲန်ပ္လေါည်ႎိူဝ်ႈႎါင်ပနောလှညီမ်မှိူမ် ဗုဒ္ဓဘာသာ ပ္လံက်တံင်ဇူႈ ကဒါႇတအာင်း လှေင်(5)ဆငည်း ကနာည်ပဇာရ်ပ်ုန်နံပ်ဆမားလှညီမ်မှိူမ်ကာည်း တြားဆမားကံမ်ကျံင်တို ကောန်ဒဲႇယိူဝ်ႇဘံန်းဂဲအောႏ။