ဘည်မိုႈဘည်ဘာည်းအ်ုန် ကျံရ်တီမ် ဆငည်း(26) အခိင်ခီညှာ(11:28)မိနေတ်ဒိူန် ဆီုက်ဘြာန်ဇေဝ်ဂဲ ဒါနောႈကယေင်တေဲင် ကူန်ရဝ်မာဂါင်ဂဲ ဒါဒရိုင်းရောတ်ဒေဲႈပဴင်ပ္လေဘျုင် ပပါပိုက် လံက်အီမာည်း အဆာက်(61)ဆန်ုမ် ယံမ်းဟာဝ်းပွံတ်ကဆီုဝ်ဒီန် ကာည်း ဂါင်ဂေါည်(1)ဂါင် လူလှဲဝ်ႏ။

ကျံရ်တီမ် ဆငည်း(24) အခိင်ရဆံန်(1:08)မိနေတ်ဒိူန် အာဝ်မိူဝ်ႈပဲန်ကတီုက်ကပဲင်မာ် ဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် တေဲင်‌ကျောင်စဝ် ပရဝ်ပီန်တီး၊ ဂေါႇပ္လေဘျုင်ပဴင် ဆီုက်ဘြာန်ဇေဝ်ဂဲဘည်ဒီန် လံက်လူလှဲဝ်ႏဟာဝ်း ‌ကျောင်စဝ်ကာည်း ႎှါင်းဒီဆုင်ဆောမ်။

ဖုင်ပလိက်လှံင်ကုင်တအာင်းဂဲ ရေဲန်ဇီုင်းကာန်စေတ်ဆေး ဒီဟာဝ်းဝီရ်ဂီုန်းကူန်ရဝ်မာဂါင်ဂဲ၊ ရေဲန်ဇီုင်းကာန်စေတ်ဆေးဟာဝ်း မိူဝ်ႈ အာဝ်မိူဝ်ႈ အီးတာင်ဒေဲႈခံင်ယိူည်ႇကာည်း စေတ်ဆေးဟာဝ်း မိူဝ်ႈ အာဝ်မိူဝ်ႈအီးတာင်ဒေဲႈကူမ်ပ်ုန်ထိင်ဘိအူန်း အီအာဝ်ဘိူန်းထုက်ရိူရ်ႈလေႈကဲနီန်။

ပဲန်ငံရ်က္လိုႇဟာဝ်းဒီန် တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ပျံတ်ယံတ်ငံရ်ဂဲ ကာည်း ကူန်ရဝ်မာဂါင်ဂဲ ကစုကပိုမ် ဘယ်ပျံတ်ယံတ်ဟာဝ်းငံရ် အခိင်ရဆံန်(12:27)မိနေတ်ဒိူန်အောႏ။

ဘံန်ဟောည်ႇဒေဲႈ ကျံရ်တီမ် ဆငည်း(9) အခိင် ခီညှာ(10:20)ဒိူန် ဖုင်ပလိက်ကုင်တအာင်းဂဲ အခိင်ရေဲန်ဇီုင်းကာန်စေတ်ဆေး ပဂီတ်ကပုလေလုဒိူန် ဘိူန်းတိုည်းတိုအီးဒါခံင်ယိူည်ႇ အီမာည်း တားကျော်မို အဆာက်(33)ဆန်ုမ် ယိူဝ်းကဂေါပ်တောပ်ဘိုး ဖိင်လူည်းဟံပ်အူန်း ခေဲင်ကဘဲဝ်ဒဲႇ(1)ကဘဲဝ်ဘည်ဒီန်။

ပ်ုန်ဘိူန်းတိုည်းအီမာည်းကဲဒီန်မိုႈ တာဆျှောလီန်း အဆာက်ဘိူန်း(26)ဆန်ုမ်၊ တာလီန်ချှာန့် အဆာက်ဘိူန်း(23)ဆန်ုမ်၊ မံင်အံင်ဟေင် အအာက်(20)ဆန်ုမ် ကာည်း တာအံင်မေင် (ဒါ်ႈ) (တာအည်ကုလား)၊ ကဇေန်နီန်း ဖုင်ပလိက်လှံင်ကုင်တအာင်း တိုည်းအူန်းကဲ နှာင်းတိူဝ်ႈလာည်း ဟာဝ်းအရေးတောပ်လိူည် ဘည်ဥပဒေ တီုက်ယာႈအရေးခံင်ယိူည်ႇအောႏ။

ကောန်အီမာည်းဂဲဒီန် တား‌ရှောလဲင် ဘိူန်းအဆာက်(26)ဆန်ုမ်၊ တားလဲင်ချန့် ဘိူန်းအဆာက်(23)ဆန်ုမ်၊ မာည်းအံင်ဟိန်း ဘိူန်းအဆာက်(20)ဆန်ုမ် ကာည်း တားအံင်မိန်း ဘိူန်းအဆာက်(32)ဆန်ုမ်ဂဲဒီန် ဖုင်ပလိက်ကုင်တအာင်းဂဲ နံင်လာည်းဟာဝ်းအ‌ရေး တောပ်ဘည်ဥပဒေ အရေးခံင်ယိူည်ႇဒီန်အောႏ။

အမှိူဝ်ဒိူန် အခိင် ရဆံန်(12:22)နြီထာန်နီန်း ဆီုက်ဘြာန်ဇေဝ်ဂဲ ဒါယာင်ပ်ုရ် ‌ရောတ်ဒေဲ;ပ္လေႈဘျုင် ပလှံင်မာဝ်းႎံင်း ကဒါႇ ရဝ်ပါင်သပျေ ကာည်း ရဝ်ပါင်ကွမ် လံက်ဟာဝ်း ကောန်အီပ်ုန်(1)အီး ကတူႈဖေးဘာတ် ကာည်း ဂါင်ဂေါည်(4)ဂါင် လူလှဲဝ်ႏဟာဝ်းအောႏ။