ဆန်ုမ်2026 ကျံရ်ဖံန် ဆငည်း(31) အခိင်ရဆံန်(12)နြီဒိူန် ခေဲင်ကုင်တအာင်း၊ အိူင်အေဲမ်ခြီရ်၊ လှံင်အေဲမ်ခြီရ်၊ ပရဝ်ကော်င်တံပ် ယာမ်ဇ်ုမ်ႏပ်ုန်တိုမ်ကစုအူန်း ကနာည်ဒါရေဲန်ဇီုင်းကာန် ထုက်လေႈမာဝ်းမိူင်တူန်း ငျားဒေကလူည်ႇပဒူႈဟာဝ်း။

ကုင်တအာင်း၊ အိူင်ရူကော၊ ခေဲင်လှံင်အိုမ်ငျံရ် တံပ်အွံရ်ပ်ုန်လောတ်ကပီုန်တအာင်း-PSLF/TNLA တီုင်ဌာနဂဲ ကာည်း ကူန်ရဝ်မာဂါင်ဂဲ ကစုကပိုမ် ဟာဝ်းတီႇဆ်ုမ် တံင်ပိုႈ၊ တံင်ပ္လေ (12000)လေႈ ကဒါႇရဝ်ခိုဖိတ်၊ ရဝ်မိုင်းဆင် ကာည်း ရဝ်ဘော်တွင်း လေႈတာပ်ဟာဝ်းဒေင်ဒါင်း ကျံရ်ဖံန်၊ ဆငည်း(25) ‌ရောတ် ဆငည်း(27)။

တံပ်အွံရ်ပ်ုန်လောတ်ကပီုန်တအာင်း-PSLF/TNLA အီမိုႈတီုင်ဌာန ကောန်အီပ်ုန်ဟြေဲႈဒါင်းဟိုက်ဇာရ်ဂဲ ခေဲင်ကျံရ်ဖံန်နီန် ဘယ်လေႈဒေင် ဒဲႈလော်င်ပိင်ငျာ ခေဲင်ရဝ်(13)ရဝ်အောႏ။

ပလှံင်ရူကော တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ပလိက်ကုင်တအာင်း ကာည်း အီရံပ်ဇီုင်းကာန်ခေဲင်တီုဌာန ကပိုမ်ဒေ ဟာဝ်းစေတ်ဆေး ဒီယံင်းဆဲင် ဂြိုပ်ုန်ဟောမ်ပ်ုန်ဟာပ် ကာည်း ဆဲင်ဆနံမ်း အီဆန်ုမ်ဒိုည်ႇ။

ဖုင်ကပါင်းခေါခါႇတအာင်း-( Ta’ang Health Organization -THO) ကာည်း ကောင်ဆံရ်ခေါခါႇကုင်တအာင်း-(Ta’ang Land Health Council -THC) ကပိုမ် ထိုးဒဲႈဆနံမ်းဒံန်ခြဲ တကောန်ဒဲႇ ကာည်း မာကောန်ဒဲႇတိုဇံန် ပလှံင်အိုမ်ယ်ုရ် ၊ ခေဲင်ကုင်တအာင်း။