ကုင်တအာင်း၊ အိူင်အေဲမ်ခြီရ်၊ ပလှံင်အေဲမ်ငူည် ပ်ုန်ကယေင်မောကံပ် ကူန်ရဝ်မာဂါင်အယ်ဂဲ ႎီရ်ဘိူန်းဇိုဇာတ်ပြီမ်ဂဲ ပ်ုန်ဖုင်ပလိက်လှံင်ဂဲဘိူန်းတိုည်းထိင်အူန်း တိုအီးဒါခံင်ယိူည်ႇအီမာည်း(2)အီးကဲနီန် ဟောည်ႇႎီရ်ဘြဲဆားဒဲႈအကျံင်ဂဲ လှေင်(6)ကျံရ် ႎီရ်အာပ်ဒဲႈဟာဝ်း တရဟောမ်ရမာ။

ကုင်တအာင်း၊ အိူင်အေဲမ်ခြီရ်၊ တံပ်အွံရ်ပ်ုန်လောတ်ကပီုန်တအာင်း PSLF/TNLA ဖုင်ဂါင်ဆပဲဆငါးဂဲ ပ်ုန်ကယေင် ဘြဲဆာဟာဝ်းဒေင် ခေဲင်ဇံင်၊ လှံင်အေဲမ်ခြီရ်ဒီန် ကနာည် ကူန်ရဝ်မာဂါင်ဂဲ ဘိူန်းဒေဟာဝ်းႎီရ်ကတီးကရီး။

ကုင်တအာင်း၊ အိူင်အေဲမ်ခြီရ်၊ ဖုင်ဘေဲႇတအာင်း-TLAဂဲ ရေဲန်ပ္လေါည်ႎိူဝ်ႈႎါင်ပနော ဖီုက်လျှံင်ပဲန်ဆြာ ဘေဲႇတအာင်း (TOT) (Training of Trainers) လိူဝ်ႈ(6)နီန် ဇူႈကျံရ်ပူရ်၊ ဆငည်း(15) အခိင်ခီညှာ (9:00)နြီ ခေဲင်ႎါင်ပနော ဖီုက်လျှံင်ပဲန်ဆြာ ကဲပနောဟာဝ်းဘေဲႇလူမ်တအာင်း ကာည်း ပနောဘည်ကြောႈက္လာင်းဖာဆာအယ်တအာင်း ခေဲင်လှံင်အေဲမ်ခြီရ်။

ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ်၊ ပရဝ်ဘံန်လိုမ် အခိင်ဖုင်ပလိက်ကုင်တအာင်း ရေဲန်ဇီုင်းကာန်စေတ်ဆေး တိုအီးကဇိူရ်ႈကယံင်းခံင်ယိူည်ႇ ကာည်း တိုအီးဒါခံင်ယိူည်ႇ မောကံပ်ဟြာည်ကမာ်ႈ ယိူဝ်းဆငါဝ်းဆဒါင် တကူန်ရဝ်မာဂါင်ဂဲ အခိင်ဖုင်ပလိက်လှံင်ဂဲ ဟာဝ်းစေတ်ဆေးတိူရ်ႈ ဘိူန်းတိုည်းတိုအီးကဇိူရ်ႈကယံင်းခံင်ယိူည်ႇ အီပ်ုန်(1)အီး၊ အီမာည်း(1)အီး ကာည်း တိုအီးဒါခံင်ယိူည်ႇ အီမာည်း(1)အီး။