ကုင်တအာင်း၊ အိူင်အိုမ်ယ်ုရ်၊ ပ်ုန်ကယေင်ဖုင်ကကာႈအီကဇောည်ငိူပ်မေန်းဂဲ ႎိူဝ်ႈဟာဝ်းႎါင်ပနောနီန်း ကနာည်ပဇာရ်ဘည်လိုဒံန်ခြဲ ငိူပ်မေန်းဆူနာ ကူန်ရဝ်မာဂါင်ဂဲ။ ဘံန်ဟောည်ႇဒေဲႈ ကျံရ်ပူရ်၊ ဆငည်း(28) ရေဲန်ဟောည်ႇပ္လေါည်ပ္လိုတ်ႎါင်ပနော ဘည်ကစု အီငိူပ်မေန်းဆူနာ လိူဝ်ႈ(4) ကာည်း လိူဝ်ႈ(5)။

ခေဲင်ကျံရ်ပူရ်ဒိူန် ကောင်ဆံရ်ဇီုင်းပိင်ငျာကုင်တအာင်းဂဲ ရေဲန်ဟာဝ်းပ္လေါည်ကမိုန် ဘည်ကကည်တိူရ်ႈ စေတ်မေန်းပ္လေါည်ဆမွံတ်ဘေဲႇ ခေဲင်ဆန်ုမ်ပနောဘေဲႇ 2026-2027 ခေဲင်လှံင်တောန်ဒီ ဘည်ကယေင်ရေဲန်ဟာဝ်းမိုႈ မောကံပ်ဘယ်ပဇာရ်ပ်ုန်နံပ်ဆမား ဘည်ကကည်တိူရ်ႈစေတ်မေန်းကာည်း မောကံပ်ဘယ်ရေဲန်ဟာဝ်း တောပ်ဘာည်း ကနှေရ်ဆာန်နှုန်း ကျောင်အီးဟံရ်ကဲ ဆနီတ်လံပ်ပိင်ငျာ ဘည်ကကည်တိူရ်ႈ စေတ်မေန်းပ္လေါည်ဆမွံတ်ဘေဲႇ ချှံန်တာန်းဇာရ် Grade-12 စေတ်မေန်းကပီုန် ခေဲင်ကုင်တအာင်းနီန်အောႏ။

ကုင်တအာင်း၊ အိူင်အိုမ်ယ်ုရ်၊ ခေဲင်လှံင်အိုမ်ယ်ုရ် ဖုင်ကာ်မ်မတီဇီုင်းကာန်ဘြောင်ချှာင်လှံင်ဂဲ ဆာ်အွံရ် တာဘြောင်ဇံင် ကာည်း တာဘြောင်ရဝ် ရေဲန်ပါင်ကတူႈကငျား ဆငည်း(3)၊ ကျံရ်တာရ်၊ ကမိုန်ဟာဝ်း လောင်ဇီုင်းကာန်အရာပ်အရာကတာႈဒါင်းဇာရ် ကာည်း ဇီုင်းကာန်ဘြောင်ချှာင်။

ကုင်တအာင်း၊ ခေဲင်ကျံရ်ပူရ်နီန်း ဖုင်ကလိက်ကုင်တအာင်းဂဲ ဘိူန်းတိုည်း တိုအီးကဇိူရ်ႈကယံင်းခံင်ယိူည်ႇ(3)အီး ကာည်း အီဒါ(16)အီး ပလှံင်ရူ‌ကော၊ လှံင်အေဲမ်ခြီရ်၊ လှံင်မိူင်းလိုင် ကာည်း လှံင်အိုမ်ယ်ုရ်။

ခေဲင်ကျံရ်ပူရ်နီန်၊ ကော်ဆံရ်တီုင်‌ခေါခါႇကုင်တအာင်းဂဲ လေႈဒေင် တိူဝ်ႈမေန်းခေါခါႇ ကာည်း ရေဲန်ဇီုင်းကာန်ဒံန်ခြဲခေါခါႇ ကနာည်နှာင်းပ်ုန်ဒေဲႈတောန်မျိုး တမာကောန်ဒဲႇ ကာည်း တကောန်ဒဲႇအဆာက်(2)ဆန်ုမ်၊ မာကောန်ဒဲႇအီဒဲႈဘူ ပရဝ်(9)ရဝ် ခေဲင်ကုင်တအာင်း။