ကုင်တအာင်း၊ အိုမ်ဘြည်ကတာည်း တီုင်တံပ်ဒါင်း(6)၊ လှံင်မိူင်ယော်၊ ခမိုလောည်လီန်၊ ရဝ်မာန်ကာင်၊ ကောန်အီမာည်း(2)အီး တိူဝ်ႈဒေကနိုက်ပ္လေဒါင်း ပ်ုန်ညှံမ်ပဒူႈ ပ္လေဒါင်း ဒီန်စီပဒူႈ လံက်ဟာဝ်း(1)အီးယံမ်း၊ (1)အီး ကတူႈဖေးဆဲဝ်။

ဘည်မိုႈဘည်ဘာည်းအ်ုန် ဘံန်ဟောည်ႇဒေဲႈ ကျံရ်ဖိုန် ဆငည်း(11) အခိင်ရမှိူဝ်(7)နြီ တာညေင်ချှာန်းအံင် အဆာက်(33)ဆန်ုမ် ႎါအ်ုန်ဒါဟောည်ႇ ခံင်ယိူည်ႇဒိူန် မာအ်ုန်စီယိူဝ်း အ်ုန်တိူဝ်ႈဘြားဂြိုခြီရ်ခေဲင်ဂါင်။ ဂေါႇဘည်ဒီန် အ်ုန်စီတိူဝ်ႈ တဆီး(ဆဒေါ)တစ်ပိုင်း ဘံက်တုရမောင် စူးဟာဝ်းကိင်မာအ်ုန်ဘည်ဒီန်။

ဘည်မိုႈဘည်ဘာည်းအ်ုန် ဘံန်ဟောည်ႇဒေဲႈ ကျံရ်ဖိုန် ဆငည်း(17)ဒိူန် ကဝ်အီဂေါည်ပဇံင်ပါဟဲတ် တာစော်ဆိုးခဲင် အဆာက်(30)ဆန်ုမ် ဂေါႇမိုႈယိူဝ်းနံပ်ဒါ အ်ုန်ကဇိူရ်ကယံင်းခံင်ယိူည်ႇ ကုင်တအာင်း ဖုင်ပလိက်လှံင်နောင်ချှိုဂဲ စီဟာဝ်းစေတ်ဆေး ပဂါင်‌ဂေါည်ဂဲ ဘိူန်းတိုည်းခံင်ယိူည်ႇတအ်ုန်။

ဘံန်ဟောည်ႇဒေဲ ကျံရ်ဖိုန် ဆငည်း(14) အခိင်စူမ်အံပ် (4:30)ဒိူန် ကဝ်အီဇီုဝ် မာည်းနာည်လီန်ထဲက် အဆာက်(17)ဆန်ုမ် အခိင်ဂဲဂေါအ်ုန် ဟာဝ်းကနိုက်အိုမ် ခေဲင်ပ္လေါင်ဟိုဆာည်းဒိူန် ငျားစိုမ်အိုမ်ဟြာည်ႇကမာ်ႈဟာဝ်း။

ဘည်မိုႈဘည်ဘာည်းအ်ုန် ဘံန်ဟောည်ႇဒေဲႈ ကျံရ်ဖိုန် ဆငည်း(16) အခိင်စူမ်အံပ်(6)နြီထာန်နီန် ကဝ်အီဇီုဝ် တာထူန်းထူန် အဆာက်(50)ဆန်ုမ် အခိင်အ်ုန်ဟာဝ်းယီုဝ်(ပဴင်)ဆီမ်း တပြောတံပ်ဆခန်းဆီုက်ဘြာန်ဂဲ ခလရ(23)ဒိူန် ငျားဒေညဲ့မဴင် ပ်ုန်တီႇအူန်းဂဲ အာည်ႇနီန်။

တံပ်အွံရ်ပ်ုန်လောတ်ကပီုန်တအာင်း PSLF/TNLA ပလိက်ကုင်တအာင်း ဘိူန်းဒေတိုည်းတိုအီးကဇိူရ်ႈကယံင်းခံင်ယိူည်, (1)အီး ကာည်း တိုအိီးဒါခံင်ယိူည်ႇ (50)အီး ပလှံင်ရူကော၊ အိူင်အိုမ်ယ်ုရ်၊ ခေဲင်ကုင်တအာင်း။

ကုင်တအာင်း၊ အိူင်အိုမ်ယ်ုရ်၊ လှံင်ရူကော တံပ်အွံရ်ပ်ုန်လောတ်ကပီုန်တအာင်း PSLF/TNLA အီရံပ်ဇီုင်းကပ္လိူင်တီုင်ဌာနဂဲ ကာည်း ကူန်ရဝ်မာဂါင်ဂဲ ကစုကပိုမ်ဒေ ရေဲန်ဆပယ်ဆငါးဟာဝ်း ညှိူဝ် ခေဲင်တပ္လေါင်အိုမ်။

ကုင်တအာင်း၊ အိူင်ကိုက်ခည်း၊ ပလှံင်နံမ်ဖတ်ကာ တပြောဂါင်ကနံမ်း ကားဘတဂါင်အူကြောင် ငျားဒူႈဟာဝ်း ကားအူကြောင်းအီဇံင်းအူန်း ကောန်အီပ်ုန်အူအီး ကတူႈဖေးဆဲဝ်ဒါင်း။

ကုင်တအာင်း၊ အိူင်မိုဂူႈ၊ လှံင်မိုဂူႈ၊ ပရဝ်ပါင်ပေတ် ဘေဲႇလူမ်တအာင်း-TLAဂဲ ဆော်အွံရ်ရေဲန်ဟာဝ်းပ္လေါည်ပ္လိုတ်ႎါင်ပနော ဘေဲႇလူမ်တအာင်း ပရဝ်ပါင်ပေတ်ဒီန် တံပ်အွံရ်ပ်ုန်လောတ်ကပီုန်တအာင်းPSLF/TNLA ဂေါပ်တားချှာင်ဇီုင်းကာန်‌‌တောန်နဲ(1) ခူန်အွံရ်ချု တားအိုမ်တမာဝ်း ဟိုက်ရောတ်‌ဒေဲႈအောႏ။