ဂေါႇဆီုက်ဘြာန်ဇေဝ်ဂဲ ဒါနောႈကယေင်တေဲင် ကူန်ရဝ်မာဂါင်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် ထာန်ဇံန်(500) လံက်အီမာည်း(1)အီးကာည်း အီပ်ုန်(3)အီး ယံမ်းဟာဝ်း၊ တောပ်ဘိုးကောန်ဒဲႇ(1)အီး ၊ အီမာည်း(2)အီးကာည်း အီပ်ုန်(2)အီး ကတူႈဘာတ်။

ကုင်တအာင်း ခေဲင်ကျံရ်တီမ်ဒိူန် ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ပဴင်ပ္လေဒါင်းကာည်း ဒါဒရိုင်း ပဴင်ပ္လေဘျုင် ပလှံင်မာဝ်းဓံင်း (10)လိူဝ်ႈ၊ ပလှံင်ဆဘော (1)လိူဝ်ႈ ၊ လှံင်မိုဂူႈ(2)လိူဝ်ႈ ကာည်း မိူင်လိုင် (1)လိူဝ်ႈ လံက်ဟာဝ်း ကောန်အီမာည်း(3)အီးယံမ်း၊ အီမာည်း(1)အီး ကာည်း ကောန်အီပ်ုန် (4)အီး ကတူႈဘာတ် ဂါင်(45)ဂါင်၊ ကျောင်ပနောဘေဲ(1)ကျောင် ကျောင်စဝ်(2)၊ ဓှါင်းဆုင်ဆာမ်(1)ကျောင်၊ ဂါင်ဓါႈ(2)ဂါင် ကာည်း ကား(1)ကြောင် ကတူႈဆိက်ပ္လေဘျုင်လံက် လူလှဲဝ်ႏဟာဝ်း။

ဘည်မိုႈအ်ုန် ကျံရ်အူကိူရ် ဆငည်းအဒိူဝ်း အခိင်ခီညှာဇေဝ်း(7:20)မနေဲတ်ဒိူန် ဆီုက်ဘြာန်ဇေဝ်ဂဲ ဒါနောႈကယေင်တေဲင်ကူန်ရဝ်မာဂါင်ဂဲ ဒါယာင်ပ်ုရ် ရောတ် ဒေဲႈပဴင်ပ္လေဘျုင် ပလှံင်အိုမ်ငျံရ်(1)ပိုင်းကာည်း လှံင်ရူကာ (4)ပိုင်း။

ဘံန်ဟောည်ႇဒေဲႈ ကျံရ်တီမ် ဆငည်း(27) အခိင်(4:30)ဒိူန်မာ် ဖုင်ပလိက်လှံင်ဂဲ ဘိူန်းတိုည်းတိုအီး ဒါခံင်ယိူည်ႇ တာနာည်ထူန်း အဆာက်(54)ဆန်ုမ် ဒီစေတ်ဆေးဂိက် ပလှံင်ဆဘော ။

ဆီုက်ဘြာန်ဇေဝ်ဂဲနီန် ဆဲႈဒါႇဂဲ ဒါယာင်ပ်ုရ်၊ ပ္လေဒါင်းကာည်း ဒရိုင်း ပဴင်ပ္လေဘျုင်ဘည်ဒီန် ဘည်ကဇေန်နီးမာ် ဂေါႇဂဲဒါ ပ္လေဘျုင်ငံရ်က္လိုႇ ပဴင်လီပ်ခေဲင်လှံင် အီမိုႈ လူမ်ပျံတ်ယံတ်ငံရ်၊ လူမ်တီုင်အိုမ်ဘြည်ကတာည်း၊ လူမ်ပလိက်ကာည်း ခေဲင်လှံင်ဒီမံင်ခ္လံက်ဒိူန် ပဲန်ဟာဝ်းဒိုႇငံရ်က္လိုႇ။

ဘည်မိုႈအ်ုန် ကျံရ်အူကိူရ် ဆငည်းအဒိူဝ်း အခိင်ခီညှာ(10:49)မနေဲတ်ဒိူန် ပရဝ်ယေထောည်ဒီန် ဆီုက်ဘြာန်ဇေဝ်ဂဲ ဒါနောႈကယေင်တေဲင်ကူန်ရဝ်မာဂါင်ဂဲ ဒါယာင်ပ်ုရ် ပဲင်ပ္လေဘျုင် ထာန်ဇံန်(250)အာရ်ပိုင်း လံက်အီမာည်း (1)အီး ကာည်း ဂါင် အူဂါင်လူလှဲဝ်ႏဟာဝ်း။

ယာမ်မိုႈ ကျံရ်တီမ် (29) ဆငည်း အခိင် ခီညှာ(10)နြီဒိူန် တာကိုအူးဒီန် အခိင်အ်ုန်တိူဝ်ႈကႎှါင် ပ်ုန်ဟောည်ႇတိုက်ႎီရ်တိုအီးယံမ်း ဒါႈဒေဟာဝ်းႎီရ် ပလံပ်က်ုတ်ဆငည်း စီငျားဒေညဲ့မဴင်တိင်အူပိုင်း ယံမ်းဟာဝ်းပွံတ်။

ပလှံင်မိုဂူႈ ပရဝ်ပါင်မထေက် ကျံရ်တီမ်၊ ဆငည်း(28)ဒိူန် အခိင်ဖုင်ပလိက်ကုင်တအာင်းဂဲ ရေဲန်ဇီုင်းကာန်စတ်ဆေးအ‌ရေးခံင်ယိူည်ႇ စီဘိူန်းတိုည်း တာအာည်ႇကျော်အဆာက် (30)ဆန်ုမ် ယိူဝ်းကဂေါပ်တောပ် ဖိင်လူည်းဟံပ်အူန်း ခေဲင်က္လာ့်ဆပျာ(2)က္လာ့်၊ ဟံပ်အူန်းဘိုး ဖိင်လူည်းခေဲင်ကဒည်ကဘဲဝ်အိုမ်ငါမ်းဘကာည်း ကအာင်းယာမ(504)ကအာင်းကာည်း ဓှုင်အူပိုင်း။

ကုင်တအာင်း၊ လှံင်မာဝ်းဓံင်း၊ ဘည်အာဝ်မိူဝ်ႈမပဲန်ကတီုက်ကပဴင်မာ် ဆီုက်ဘြာန်ဇဝ်ဂဲ ရောတ်ဒေဲႈပဴင် ပ္လေဒါင်း ပရဝ်နံမ်ဆော လံက်ဟာဝ်း ကောန်အီမာည်း(1)အီး ကတူႈဘာတ်။