ဘည်မိုႈအ်ုန် ဘံန်ဟောည်ႇဒေဲႈ ကျံရ်အူကိူရ် ဆငည်း(20)ဒိူန် အခိင်ရဆံန်(2:30)နြီ ပရဝ်ကယားဒါင်း၊ ဇံင်(4) ပဂါင်ဂေါည် တာအထူး ငံရ်ဝါယာပဲန်ဆျှောတ် ပဲန်ငံရ်က္လိုႇဟာဝ်းဂါင်၊ ဂေါႇပဲန်ငံရ်က္လိုႇဂါင်ဘည်ဒီန် ဆဲင်ကယ်(1)ကြောင်၊ စဲတ်ဘိင်(2)ကြောင်၊ ဂြိုခြီုင်အီဂေါည်ခေဲင်ဂါင်ဂဲ ကဆူမ်းဟာဝ်းဒိုႇ ကစုကပိုမ်ငေါႈခံန်အ်ုန်မိုႈ (70)ဆဲန်ဘျာအောႏ။

ကျံရ်အူကိူရ် ဆငည်းအဒိူဝ် အခိင် ခီညှာ(1:33)မိနေတ်ဒိူန် ပလှံင်မိူင်လိုင်၊ ရဝ်ပါင်ဆာန် အာဝ်မိူဝ်ႈပဲန်ကတီုက်ကပဴင်မာ် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(2)ပိုင်း။

ကျံရ်အူကိူရ် ဆငည်း(21) အခိင်ရဆံန်(2:58)မိနေတ်ဒိူန် အာဝ်မိူဝ်ပဲန်ကတီုက်ကပဴင်မာ် ဆီုက်ဘြာန်ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(2)ပိုင်း ဒီပါင်ပ္လေဖူဆယ် ဇံင်ကာန့်တော၊ ပလှံင်မိုဂူႈ။

ဘည်မိုႈအ်ုန် ဆငည်း(20) အခိင်ရမှိူဝ်း(8:03)မနေတ်ဒိူန် ဆီုက်ဘြာန်‌ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင် ပ္လေဘျုင် ထာန်ဇံန်(250)(2)ပိုင်း ပလှံင်ကုင်ငှေါ ၊ တပြောက္လာမျိုမ စီဇောႈပဒူႈလံက်ဟာဝ်း အီမာည်း(1)အီး၊ ကောန်အီပ်ုန်(1)အီးယံမ်း၊‌ ကောန်အီမာည်း(1)အီး ကာည်း အီပ်ုန်(1)အီး ကတူႈဘာတ်၊ ဂါင်(10)ဂါင် ၊ ဂါင်ဆဲင်(5)ဂါင် လူလှဲဝ်ႏဟာဝ်း။

ဘည်မိုႈအ်ုန် ဆငည်း(19) အခိင်ရဆံန် (2:06)မနေတ်ဒိူန် ဆီုက်ဘြာန်‌ဇေဝ်ဂဲ ဒါဇဲတ်ႎှည်တာ ရောတ်ဒေဲႈပဴင် ပ္လေဘျုင် ထာန်ဇံန်(250)(1)ပိုင်း ပလှံင်မိုဂူႈ စီဇောႈပဒူႈဟာဝ်း တေဲင်လိုင်းဒီဟျံင်အျံရ်။

ကျံရ်အူကိူရ် ဆငည်းအဒိူဝ်နီး (19) အခိင်ရဆံန် (12:30)မိနေတ်ဒိူန် ဂေါႇဆီုက်ဘြာန်ဇေဝ်ဂဲ ဒါနောႈကယေင်တေဲင်ကူန်ရဝ်မာဂါင်ဂဲ ဒါဇဲတ်ႎှည်တာ ရောတ်ဒေဲႈပဴင်ပ္လေဘျုင် ထာန်ဇံန်(250)(1)ပိုင်း လံက်တာအံင်အံင် အဆာက်(28)ဆန်ုမ်ကာည်း တာချှီတ်ဆာန်းမံင် အဆာက်(24)ဆန်ုမ် ကတူႈဘာတ်၊ ဆဲႈဒီန် လံက်ဟာဝ်းဘိုး ဂါင်ဂေါည်(2)ဂါင်၊ ယုင်စာက်မျံမ်(1)ယုင်၊ ကားပျံတ်ယံတ်ငံရ်(5)ကြောင်ကာည်း ကားကူန်ရဝ်မာဂါင်ဂဲ(4) ကြောင် လူလှဲဝ်ဟာဝ်း။

ကျံရ်အူကိူရ် ဆငည်း(18) အခိင် ရမှိူဝ်း(8:40)မိနေတ်ဒိူန် ပလှံင်မာဝ်းဓံင်း၊ ပရဝ်(11)မဲင်ဒီန် ဆီုက်ဘြာန်ဇေဝ်ဂဲ ရောတ်ဒေဲႈပဴင် ပ္လေဘျုင် ထာန်ဇံန်(500) (1)ပိုင်း လံက်ဟာဝ်း စဝ်ဆောင်ခါ (2)ပါး ကတူႈဘာတ်၊ ကျောင်စဝ်(1)ကျောင် ကာည်း ဓှါင်းကျောင်(1)ကျောင် လူလှဲဝ်ႏ။

ဆီုက်ဘြာန်ဇေဝ်ဂဲ မိူဝ်ႈနောႈကယေင်ဒါင်းဒါင်းတေဲင်ကူန်ရဝ်မာဂါင် ရောက်အခိင် (8:25)နထာန်နီး ဆီုက်ဘြာန်ဇေဝ်ဂဲ ဒါပွံတ်ယာင်ပ်ုရ် ရောတ်ဒေပ္လေႈပ္လေဘျုင် ထာန်ဇံန် (250)အာရ်ပိုင်း လံက်ဟာဝ်းကောန်ကညောမ် ဘိူန်းအဆာက်( 10 )ဆန်ုမ် လိုည်းနီလာအံင်၊ လိုည်းယီယီလဲင် ဘိူန်းအဆာက် (21)ဆန်ုမ်၊ လိုည်းဆာန်းဆာန်းအူး ဘိူန်းအဆာက် (21)ဆန်ုမ်၊ ယာအေးတာင်း ဘိူန်းအဆာက်( 35)ဆန်ုမ်၊ တာတာန်းကျော် ဘိူန်းအဆာက်( 42 )ဆန်ုမ် ကာည်း ယာအေးဟေင် ဘိူန်းအဆာက် ( 47 )ဆန်ုမ် ယံမ်းဟာဝ်းပွံတ်ကဆီုဝ်ဒီ။