ဖုင်ပလိက်ကုင်တအာင်းဂဲ ဘိူန်းတိုည်းအူန်း ဖုင်အီးတောပ်ဒေဘြားဆဲင်ကယ် ကူန်ရဝ်မာဂါင်ဂဲ အီမာည်း(5)အီး ပရဝ်ကုင်ကမာည်း၊ လှံင်အိုမ်ယ်ုရ်၊ ခေဲင်ကုင်တအာင်း။

ပလိက်ကုင်တအာင်းဂဲ တိုည်းအူန်း ကနာည်နံင်တိူဝ်ႈလာည်းအရေး တိုအီးလူည်ႇအမှုငံန် တေဲင်ကောန်ဒဲႇ အဆာက်ညှံမ်နိုက် ကောန်အီမာည်းအူအီး ပလှံင်အိုမ်ယ်ုရ် ၊ အိူင်အိုမ်ယ်ုရ်၊ ခေဲင်ကုင်တအာင်း။

ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ်၊ ပရဝ်လံင်တာ့် ကောန်ဒဲႇ(2)အီး တိူဝ်ႈဒေကနိုက်မဴင် မဴင်ဒီန်စီပဒူႈ လံက်ဟာဝ်း ကတူႈဖေးဆဲဝ်ဒါင်း။

ကုင်တအာင်း၊ အိူင်မာဝ်းႎံင်း၊ လှံင်ဆဘော၊ ပဇံင်အိုက်စီန်း(အုတ်ကျင်း) ပဲန်ငံရ်က္လိုႇဟာဝ်း ကျောင်စဝ်အူကျောင်။

ကုင်တအာင်း၊ အိုမ်ဘြည်ကတာည်း တီုင်တံပ်ဒါင်း(6)၊ လှံင်မိူင်ယော်၊ ခမိုလောည်လီန်၊ ရဝ်မာန်ကာင်၊ ကောန်အီမာည်း(2)အီး တိူဝ်ႈဒေကနိုက်ပ္လေဒါင်း ပ်ုန်ညှံမ်ပဒူႈ ပ္လေဒါင်း ဒီန်စီပဒူႈ လံက်ဟာဝ်း(1)အီးယံမ်း၊ (1)အီး ကတူႈဖေးဆဲဝ်။

ဆန်ုမ်2025၊ ကျံရ်ဖိုန် ဆငည်း(20) အခိင်ခီညှာ(9)နြီဒိူန် ရေဲန်ဟောည်ႇဟာဝ်း ပ္လေါည်ပ္လိုတ်ကျောင် ကပါင်ဖီုက်လျှံင်ဇီုင်းပိင်ငျာခြိူဝ်းတအာင်း(Ta’ang Education Academy-TEA) လိူဝ်ႈအာရ် ပလှံင်အိုမ်ယ်ုရ်၊ ခေဲင်ကုင်တအာင်း။

ဘည်မိုႈဘည်ဘာည်းအ်ုန် ဘံန်ဟောည်ႇဒေဲႈ ကျံရ်ဖိုန် ဆငည်း(11) အခိင်ရမှိူဝ်(7)နြီ တာညေင်ချှာန်းအံင် အဆာက်(33)ဆန်ုမ် ႎါအ်ုန်ဒါဟောည်ႇ ခံင်ယိူည်ႇဒိူန် မာအ်ုန်စီယိူဝ်း အ်ုန်တိူဝ်ႈဘြားဂြိုခြီရ်ခေဲင်ဂါင်။ ဂေါႇဘည်ဒီန် အ်ုန်စီတိူဝ်ႈ တဆီး(ဆဒေါ)တစ်ပိုင်း ဘံက်တုရမောင် စူးဟာဝ်းကိင်မာအ်ုန်ဘည်ဒီန်။

ဘည်မိုႈဘည်ဘာည်းအ်ုန် ဘံန်ဟောည်ႇဒေဲႈ ကျံရ်ဖိုန် ဆငည်း(17)ဒိူန် ကဝ်အီဂေါည်ပဇံင်ပါဟဲတ် တာစော်ဆိုးခဲင် အဆာက်(30)ဆန်ုမ် ဂေါႇမိုႈယိူဝ်းနံပ်ဒါ အ်ုန်ကဇိူရ်ကယံင်းခံင်ယိူည်ႇ ကုင်တအာင်း ဖုင်ပလိက်လှံင်နောင်ချှိုဂဲ စီဟာဝ်းစေတ်ဆေး ပဂါင်‌ဂေါည်ဂဲ ဘိူန်းတိုည်းခံင်ယိူည်ႇတအ်ုန်။