တအာင်းပြည်၊ ကျောက်မဲ၊‌ ကွတ်ခိုင်၊ မိုင်းငေါ့၊ နမ့်ဆန်နှင့် မန်တုံမြို့နယ်တို့တွင် တအာင်းပြည် မြို့နယ်ရဲတပ်ဖွဲ့မှ မူးယစ်ဆေးဝါးရောင်းဝယ်သူ (၁၃)ဦးနှင့် သုံးစွဲသူ (၁)ဦးတို့ကို ဖမ်းဆီးနိုင်ခဲ့သည်။

တအာင်းပြည်တွင် ဇွန်လတစ်လအတွင်း နောင်ချို၊ နမ္မတူ၊ ကျောက်မဲနှင့် မိုးကုတ်မြို့နယ်တို့တွင် စစ်ကောင်စီတပ်မှ လေကြောင်း၊ လက်နက်ကြီးနှင့် ဒရုန်းဖြင့် ပစ်ခတ်တိုက်ခိုက်မှုကြောင့် ပြည်သူလူထု (၅)ဦး သေဆုံးခဲ့ပြီး (၃၂)ဦး ထိခိုက်ဒဏ်ရာရရှိခဲ့ကာ နေအိမ် (၇၅)လုံး၊ စာသင်ကျောင်း (၄)ကျောင်းနှင့် ဘုန်းကြီးကျောင်း (၄)ကျောင်းထိမှန်ပျက်စီးသွားခဲ့သည်။

တအာင်းပြည်ပညာရေးကိုရည်ရွယ်၍ ဖွင့်လှစ်နေသည့် တအာင်းပညာရေးထီ၏ (၂၅)ကြိမ်မြောက် အမြင့်ဆုံး သိန်း (၅၀၀)ဆုကို ကွတ်ခိုင်မြို့နယ်၊ဟွေခုတ်ကျေးရွာက ဦးအိုတီမှ ဆွတ်ခူးရရှိသွားခဲ့သည်။

တအာင်းပြည်၊ တပ်မဟာ (၆)နယ်မြေ၊ နမ့်ခမ်းမြို့၊ သာယာကုန်းရပ်ကွက်တွင် နေထိုင်သည့် အမျိုးသမီး (၁)ဦးသည် ခြံရှင်းရာတွင် မိုင်းတစ်လုံးကိုပေါက်မိ၍ ပေါက်ကွဲမှုဖြစ်ပြီး သေဆုံးခဲ့ပါသည်။

တအာင်းပြည်၊ တပ်မဟာ (၇)နယ်မြေ၊ ကွတ်ခိုင်ခရိုင်၊ ကွတ်ခိုင်မြို့နယ်၊ မန်ပြိန်းကျေးရွာအနီးတွင် ယာဉ်တစ်စီး တိမ်းမှောက်မှုဖြစ်ပွားသွားခဲ့ပြီး တစ်ဦးထိခိုက်ဒဏ်ရာရခဲ့ပါသည်။

တအာင်းပြည်၊ တပ်မဟာ (၂)နယ်မြေ၊ ကျောက်မဲမြို့၊ ရပ်ကွက်(၇)၊ မြောက်ကုန်းနှင့် (၅၀၂)တပ်စခန်းဟောင်းတွင် စစ်ကောင်စီတပ်မှ လေကြောင်းဖြင့် ဗုံး (၆)လုံး ထပ်မံလာရောက်ကြဲချတိုက်ခိုက်ခဲ့မှုကြောင့် နေအိမ် (၄)အိမ်နှင့် ဘုန်းကြီးကျောင်း(၁)ကျောင်း ထိမှန်ပျက်စီးခဲ့ပါသည်။

ပလောင်ပြည်နယ်လွတ်မြောက်ရေးတပ်ဦး PSLF/TNLA မှ ဦးဆောင်ဖွင့်လှစ်ထားသော နိုင်ငံရေးသိပ္ပံ ကျောင်း အပတ်စဥ် (၁) ကျောင်းဆင်းပွဲနှင့် ဒီပလိုမာဘွဲအပ်နှင်းခြင်း အခမ်းအနားအား ဇွန်လ ၂၅ ရက်နေ့ တအာင်းပြည်တစ်နေရာတွင် အောင်မြင်စွာကျင်းပပြီးစီးခဲ့သည်။

တအာင်းပြည်၊ တပ်မဟာ (၆)နယ်မြေ၊ နမ့်ခမ်းခရိုင်၊မိုင်းဝီးမြို့၊ ရပ်ကွက် (၁)တွင် နေအိမ် (၁)အိမ် မီးလောင်မှုဖြစ်ပွားခဲ့ပါသည်။

ပလောင်ပြည်နယ်လွတ်မြောက်ရေးတပ်ဦး PSLF/TNLA၏ ဌာနတစ်ခုဖြစ်သည့် အမျိုးသမီးဖွံ့ဖြိုးတိုးတက်ရေးဌာနသည် ဇွန်လတစ်လအတွင်းကျေးရွာပေါင်း (၁၉)ရွာရှိ ပြည်သူလူထုများထံ အသိပညာပေးမှုများ ကွင်းဆင်းပြုလုပ်ဆောင်ရွက်နိုင်ခဲ့သည်။