ယာမ်မိုႈ ကျံရ်တီမ် (29) ဆငည်း အခိင် ခီညှာ(10)နြီဒိူန် တာကိုအူးဒီန် အခိင်အ်ုန်တိူဝ်ႈကႎှါင် ပ်ုန်ဟောည်ႇတိုက်ႎီရ်တိုအီးယံမ်း ဒါႈဒေဟာဝ်းႎီရ် ပလံပ်က်ုတ်ဆငည်း စီငျားဒေညဲ့မဴင်တိင်အူပိုင်း ယံမ်းဟာဝ်းပွံတ်။

ပလှံင်မိုဂူႈ ပရဝ်ပါင်မထေက် ကျံရ်တီမ်၊ ဆငည်း(28)ဒိူန် အခိင်ဖုင်ပလိက်ကုင်တအာင်းဂဲ ရေဲန်ဇီုင်းကာန်စတ်ဆေးအ‌ရေးခံင်ယိူည်ႇ စီဘိူန်းတိုည်း တာအာည်ႇကျော်အဆာက် (30)ဆန်ုမ် ယိူဝ်းကဂေါပ်တောပ် ဖိင်လူည်းဟံပ်အူန်း ခေဲင်က္လာ့်ဆပျာ(2)က္လာ့်၊ ဟံပ်အူန်းဘိုး ဖိင်လူည်းခေဲင်ကဒည်ကဘဲဝ်အိုမ်ငါမ်းဘကာည်း ကအာင်းယာမ(504)ကအာင်းကာည်း ဓှုင်အူပိုင်း။

ကုင်တအာင်း၊ လှံင်မာဝ်းဓံင်း၊ ဘည်အာဝ်မိူဝ်ႈမပဲန်ကတီုက်ကပဴင်မာ် ဆီုက်ဘြာန်ဇဝ်ဂဲ ရောတ်ဒေဲႈပဴင် ပ္လေဒါင်း ပရဝ်နံမ်ဆော လံက်ဟာဝ်း ကောန်အီမာည်း(1)အီး ကတူႈဘာတ်။

ဂေါႇဆီုက်ဘြာန်ဇေဝ်ဂဲ ဒါပ္လေဘျုင်မိူဝ်ႈကောင်ပဴင်ဘည်ဒီန် ကောန်ဆီုက်တံပ်နာန်းတအာင်းကဲ ကတူႈဘည်မံဝ်း၊ ဘည်ဂိူဝ်း၊ ဘည်ဂေါည်ကီန်းဒည်း၊ ဘည်မှောည်၊ ဘည်တိုႈဖိူမ်ချာ်န်း ပဲန်မိူဝ်ႈဒိုႇလက္ခဏာဘည်နီန် ဘည်ကဇေန်နီး ကောန်ဆီုက်(TNLA)(3)အီး ကတူႈဆနံမ်းအူန်း ပယုင်ဆနံမ်။

ယာမ်မိုႈ ကျံရ်တီမ်၊ ဆငည်း(20)ဒိူန် အခိင်ဖုင်ပလိက်ကုင်တအာင်းဂဲ ရေဲန်ဇီုင်းကာန်စတ်ဆေးအ‌ရေးခံင်ယိူည်ႇ စီဘိူန်းတိုည်း တာထဲက်နာည်အူး အဆာက် (32)ဆန်ုမ် ယိူဝ်းကဂေါပ်တောပ် ကအာင်းယာမ(20)ကအာင်းကာည်း ဓှိုင်(Oppo)အူပိုင်း။

ကုင်တအာင်း၊ အိူင်မိုဂူႈ၊ လှံင်မိူင်လိုင်၊ ပရဝ်ပါင်ဆပေ ဂေါႇဆီုက်ဘြာန်ဇေဝ်ဂဲ ဒါယာင်ပ်ုရ် ရောတ်ဒေဲႈပဴင်ပ္လေဘျုင် ထာန်ဇံန်(500)(2)ပိုင်း လံက်ကျောင်စဝ်ကာည်း ဂါင်ဂေါည်(20)ဂါင် လူလှဲဝ်ႏဟာဝ်း။

ဘည်မိုႈဘည်ဘာည်းအ်ုန် ကျံရ်တီမ် ဆငည်း(26) အခိင်ခီညှာ(11:28)မိနေတ်ဒိူန် ဆီုက်ဘြာန်ဇေဝ်ဂဲ ဒါနောႈကယေင်တေဲင် ကူန်ရဝ်မာဂါင်ဂဲ ဒါဒရိုင်းရောတ်ဒေဲႈပဴင်ပ္လေဘျုင် ပပါပိုက် လံက်အီမာည်း အဆာက်(61)ဆန်ုမ် ယံမ်းဟာဝ်းပွံတ်ကဆီုဝ်ဒီန် ကာည်း ဂါင်ဂေါည်(1)ဂါင် လူလှဲဝ်ႏ။

ဘံန်ဟောည်ဒေဲႈ ကျံရ်တီမ် ဆငည်း(23)ဒိူန် အာဝ်မိူဝ်ႈပဲန်ကတီုက်ကပဴင်မာ် ဂေါႇဆီုက်ဘြာန်ဇေဝ်ဂဲ ဒါပ္လေဒါင်းပဴင်လီပ် ခေဲင်ရဝ်ပီန်ပေါ လံက်ဟာဝ်းတာဆံန်လူန်အီးယံမ်းပွံတ်ကဆီုဝ်ဒီန်၊ ကဝ်အီမိုႈအီပ်ုန်အ်ုန် ယာနီနီကာည်း ကောန်အ်ုန် ဆုနဒီလူန် စီကတူႈဖေးဘာတ်။

ဆီုက်ဘြာန်ဇေဝ်ဂဲ အီဂေါည်ခေဲင်လှံင်လာဆေဝ် တိုန်းလေႈတိုအီးဂဲ ကနာည်နှာင်းရေဲန်ဒဲႈ ကညာလံပ်ထေဝ်စဲမ် ဒဲႈဆဒါင်တဂဲ ဒီဘြောင်ချှာင်ခေဲင်ကုင်လှံင် တံပ်ပ်ုန်လောတ်ကပီုန်တအာင်း- PSLF/TNLA ဒီမိုႈ ဘည်ဂိက်၊ ရဲင်ဘ္လောမ်တိုအီး ဂေါည်ပဂိက်၊ ဘည်မိူဝ်ႈလာက်နာက်၊ ဒီဂေါည်တံပ်ဆခါန်း ကာည်း ဘည်ဒီမိူဝ်ႈတိုအီးဂီုန်းကဲနီန်။