ဘံန်ဟောည်ႇဒေဲႈ ကျံရ်တီမ် ဆငည်း(14)ဒိူန် ရေဲန်ပ္လေါည်ႎိူဝ်ႈဟာဝ်းႎါင်ပနော လှေင်(1)ကျံရ်လလ ကောန်ႎါင်ပနောအီဟိုက် ဂေါည်ကစုကပိုမ်(25)အီးအောႏ။

ဘည်မိုႈဘာည်းဘည်အ်ုန် ကျံရ်အူကိူရ်၊ ဆငည်း(18) အခိင်စူန်အံပ် (5:30)နြီထာန်နီန် တာယည်လှကျော် ဘိူန်းအဆက်(47)ဆန်ုမ် ကာည်း တာအိုက်ဆောင် ဘိူန်းအဆာက်(54)ဆန်ုမ် ဂါရ်အာရ်ဒီန် ဂေါပ်မိုႈ ဖုင်ပလိက်ကုင်တအာင်ဂဲ ကာည်း ဖုင်တီုက်ယာ်ႈအရေးခံင်ယိူည်ႇဂဲ ဘိူန်းဆဒါင် ဒါႈဂါရ် ကရိူရ်ႈကယံင်းခံင်ယိူည်ႇ စိဟာဝ်းစေတ်မေန်းယိူဝ်ႈ ဘိူန်းတိုည်းတောပ်ခံင်ယိူည်ႇတောန်နဲအောႏ။

ကုင်တအာင်း၊ ပလှံင်အေဲမ်ခြီရ်၊ ခေဲင်ခနားဇံင်စုင်ကဲ ပ်ုန်ကယေင်ရေဲန်ဟာဝ်း မောကံပ်ကောန်တဘိုက်ဂဲ မိူဝ်ႈနောႈဖိူမ်ကခေ့ကတားနှာမ်မှည်၊ ဘည်လိုမိူဝ်ႈတာင်ကမေဲႈလည်ကမီုတ်ကာည်းဘည်လိုကဖြောမ်ကရောမ် ဇူႈရေဲန်ဟာဝ်း ပ္လေါည်ကခေ့ကတားပ္လေခုင် ခည်မိုႈကျံရ်အူကိူရ် ဆငည်း(12)ဒိူန် တံပ်အွံရ်ပ်ုန်လောတ်ကပီုန်တအာင်း-PSLF/TNLA တာမ်တားတီုင်အွံရ်(1) တာမ်ခူန်ချုဒါင်း ဇိုက်ဇာရ် ဟိုက်ရောတ်။

ခေဲင်ပ္လေါည်ကမိုန်ကဘ္လာင်းဆာင်ဒီန် ကမိုန်ဟာဝ်း နံင်ကောန်ကျောင်ဂဲ လောတ်ဒါဖေးအန္တရာယ်၊ ခေါပ်ပြာႇယာန်၊ ခေါပ်ပြာႇဒေင်၊ ခေါပ်ပြာႇပ်ုန်လိုတောန်နဲ၊ လောင်အရေးခံင်ယိူည်ႇ ကာည်း ဘည်ဖေးအန္တရာယ် ဆနံမ်ပ်ုန်နောႈကလှာည်၊ ဘည်လိုတိူဝ်ႈကနေဲႈ တြားဥပဒေ၊ မောကံပ်ပဲန်ဒေဲႈတိုအီးကျ တိုအီပဲန်၊ ပိင်ငျာလံပ်ဥပဒေ ကာည်း ကနာည်ကောန်တဘိုတ်ဂဲ ပဇာရ်ပ်ုန်နံပ်ပ်ုန်ယိူဝ်းခေဲင်နောႈခေဲင်ဖိူမ်၊ ဘည်လိုဆမားတိုပိုင်၊ ကဆီုဝ်ခေါခါႇလိင် ပ်ုန်လိုနံပ်‌တောန်နဲ ကဘ္လာင်းဆာင်ဒဲႈဟာဝ်းအောႏ။

ခေဲင်ပ္လေါည်အာပ်ဒဲႈဆဒေါကူတ် ကနာည်ပြိူရ်ႈလေႈ အီငိူပ်မေန်းတိုအီးဆဲဝ် ကောလေက် လံပ်ခေါခါႇကုင်တအာင်း လိူဝ်ႈ(2)ဒီန် ကောန်ကျောင် ကောန်အီပ်ုန်(30)အီး ဆာ်ႈအွံရ်ငိူပ်မေန်းတိုအီးဆဲဝ်- Nursing Cap ကာည်း ကောန်ကျောင် ကောန်အီမာည်း(5)အီးဒီန် အာပ်ဒဲႈဆဒေါကူတ်တဂဲ။ မိုႈဘို ပိင်ငျာကဆီုဝ်ငိူပ်မေန်းတိုအီးဆဲဝ်၊ ကဆီုပ်ကတာမ်၊ ပ်ုန်လိုတောပ်/ပ်ုန်လိုကံမ်ကာည်း ဘည်ကတူႈရံပ်ဇီုင်းကာန်ငိူပ်မေန်းတိုအီးဆဲဝ်ဂဲ နံင်အ်ုန်မိုႈ ကတိုရ်ႈတည်းဘည်ဘိူန်းဘ္လူတ်ဟာဝ်း ကောန်ကျောင်ဂဲ ကဖြောမ်ကရောမ်ဒီရ်ႈဟာဝ်းဓိဋ္ဌာန်ဆေတ်စာ။

ခေဲင်ပ္လေါည်ကဘ္လာင်းဆာင်ဒဲႈဟာဝ်း လံပ်ပိင်ငျာလောင်ခေါခါႇနီန် တံပ်အွံရ်ပ်ုန်လောတ်ကပီုန်တအာင်း- PSLF/TNLA ဂေါပ်တားချှာင်ဇီုင်းကာန်တောန်နဲ(2) ခူန်အွံရ်ဒါင်း ပါင်လ တံမ်းကြောႈႎိူဝ်ႈဟာဝ်း “ဆာ်ႈခေါခါႇပေန် မိုႈလာဘ်အူပါး” တောႇဘည်ကြောႈဒါႈ ကူန်မာအယ်အူမျိုး ဆာ်ႈအယ်ဟောည်ႇကတူႈဖေး စိဆနံမ်းအ်ုန်အာဝ်ပဲန် ယာမ်းညှံမ်ကတူႈဖေး လိုဒံန်ခြဲ။ ဆဲႈဒီန် လိုဂေါပ်/လိုဟောမ်တောႇဘည်အီဒဲႈကျတခေါခါႇအယ်၊ ပ်ုန်လိုႎဲႈမောႎဲႈ လိုတောပ်အီကျဒဲႈတတိုပိုင်အယ်။

ခေဲင်ပ္လေါည်အာပ်ဘွည်ႇဒီန် တံပ်အွံရ်ပ်ုန်လောတ်ကပီုန်တအာင်း- PSLF/TNLA တားချှာင်ဇီုင်းကာန်တောန်နဲ ခူန်ချူဘုင်ကျော် ဟိုက်ရောတ်တံမ်းကြောႈ ကနာည်ပဇာရ်လံပ်ပိင်ငျာနီန် ဖုင်လံပ်ပိင်ငျာဂဲ လိုရီတ်မံန်ဒါင်းဇာရ် ကာည်း ဇီုင်းကာန်လံပ်ပိင်ငျာနီန် အ်ုန်မိုႈအရေးဒါင်းခေဲင်ဇီုင်းကာန်ပျိူဝ်ႇယိူဝ်ႇကုင်လှံင်အူမျိူး ခေဲင်ခါန်းကဏ္ဍအူလှေင်မော အ်ုန်အ‌ရေးဒါင်းပွံတ်ခည်းယာ့်။

ဇီုင်းကာန်ပ်ုန်ႎါႈ‌ဒေင်ဒီန် ဒေင်ကတာည်းဂီန်းႎီရ်ရေဲန်အူပီန်၊ ဒေင်အူကဒါႇ ပ်ုန်ႎါႈ‌ထာန်ဒိုင်း(200)ပေ ကာည်း ထာန်ကႎါႈ‌ဒေင် (25)ပေ ရောတ် (29)ပေ၊ ဟံပ်ပနိုက်ဟာဝ်း ကတာည်း ကာည်း မာဝ်း။

ဘည်မိုႈဘာည်းဘည် ကျံရ်တီမ်၊ ဆငည်း(24)၊ အခိင်စူန်အံပ်(2:00)နြီ အခိင်ဖုင်ပလိက်လှံင်ဂဲ ကာည်း ပလိက်နဲထီင် ကစုကပိုမ်ရေဲန်ဇီုင်းကာန်စေတ်မေန်း ကဒါႇ လှံင်အိုမ်ငျံရ်၊ ဇံင်‌ရွှေမျင်တာ ဒေင်ဟိုက်ကဒါႇကောင်ဆိုရ် ဘိူန်းတိုည်း တာနေလင်းကျော် ဘိူန်းအဆာက်(44)ဆန်ုမ် ယာမ-WY(274)ကအာင်း၊ ႎှုင်- Oppo(1)ပိုင် ကာည်း ဂြူစာက်ပ်ုန်ဒါခေဲင်ခံင်ယိူည်ႇ။